Гувернерот на Тенеси и фаворитката за негов наследник категорични: Криста Пајк, која преживеа две смртоносни инјекции, да биде погубена на електричен стол

За Криста Пајк, осудена на смрт во Тенеси, за која светот слушна откако остана жива по две смртоносни инјекции, се уште постои опцијата да биде погубена. Но, гувернерот на Тенеси, Бил Ли, вели дека тоа ќе се случи ако судот не одлучи поинаку.

– Што се однесува до поединци како Криста Пајк и нејзиното злосторство, таа останува затворена според законите на државата Тенеси. Претпоставувам дека нејзината казна ќе остане иста како и претходно, освен ако судовите не одлучат поинаку, рече тој во интервју за ВСМВ.

Тој додаде дека таа ситуација е трагична, зашто Криста Пајк требаше да биде погубена одамна, а сега, со неуспешниот процес, ја продолжува болката на семејството на нејзината жртва Колин Слемер.

– Иако треба да се направи темелен преглед на тоа што се случило и зошто не успеал процесот, одговорот е едноставен: вратете го електричниот стол и брзо донесете правда за овие жртви. Како ваш гувернер, јас ќе го направам токму тоа, изјави гувернерот Ли.

Сепак, не е познато како би можела да се изврши новата егзекуција. Во Алабама, двајца затвореници, Кенет Смит и Алан Милер, преживеаја смртоносни инјекции во 2022 година, но две години подоцна беа погубени со азотна хипоксија. Криста Пајк, во случај на нов обид за егзекуција, би можела да побара електричен стол. Право на избор на овој метод за погубување во Тенеси имаат осудениците кои злосторството го извршиле пред 1 јануари 1999 година, а таков е случајот на Криста.

Исто размислува и Марша Блекбурн, фаворитката за наследник на гувернерот Ли. Во кампањата за изборите за Конгресот што ќе се одржат на 3 ноември, рече дека едно решение за да се избегнат понатамошни неуспеси е да се „врати електричниот стол“.

– Криста Пајк требаше да биде погубена одамна. Сега овој неуспешен процес само ја продолжува болката на семејството на Колин Слемер. Иако треба детално да истражиме што се случило и зошто процесот не успеал, одговорот е едноставен: вратете го електричниот стол и брзо задоволете ја правдата за жртвите. Како ваша гувернерка, јас ќе го направам токму тоа, напиша таа на платформата „Икс“.

Криста Пајк беше осудена на смрт пред повеќе од три децении, за убиството на Колин Слемер во 1995 година. Таа, заедно со тогашното момче Тадарил Шип и пријателката Шадола, ја намамила Слемер во шумата во Ноксвил, каде што ја претепале до смрт и ѝ врежале пентаграм на градите. По повеќе од 30 години во затвор, процедурата на погубување со смртоносна инјекција се изврши на 30 септември, но без успех, зашто таа остана жива и по примени две дози. Потоа беше пренесена во болница, каде што подолго време беше во критична состојба. Нејзиниот адвокат Ренди Спајви го опиша обидот за егзекуција како „суров“ и „гаден“ и објави дека ѝ предизвикал големи отоци на рацете, пневмонија и згрутчување на крвта. Нејзината состојба се подобри откако се освести и почна да зборува, а набрзо почна да оди. Пајк е пуштена од болница и вратена во затвор, каде што се уште добива медицинска помош. Адвокатите велат дека таа сега се справува со длабока психолошка траума бидејќи преживеа обид за егзекуција, што вклучува терор, болка и неизвесност „бидејќи веруваше дека ќе умре“.