Град Скопје го бележи најдобриот прв квартал во својата историја

Скопскиот градоначалник, Орце Ѓорѓиевски, се пофали дека Град Скопје го бележи најдобриот прв квартал во својата историја, со највисока реализација на капитални инвестиции досега.

– Во основниот буџет на Град Скопје за 2026 година беа планирани капитални инвестиции во износ од 1,85 милијарди денари, што претставува зголемување од 32,4 % во однос на 2025 година. Но, најважно е што овие средства не останаа само бројки на хартија. Во првиот квартал се реализирани 335,75 милиони денари, односно 18,12 % од вкупно планираните капитални инвестиции. Тоа е најдобра реализација за првиот квартал во историјата на Град Скопје – истакна Ѓорѓиевски.

Според него, тоа е резултат на дисциплина, работа, одговорност и секојдневна борба за секој денар да биде насочен таму каде што најмногу им треба на граѓаните: во улици, инфраструктура, јавни услуги, чистота, зеленило, сообраќај, функционални претпријатија и проекти што го менуваат ликот на градот.

Тој најави дека реализацијата на капиталните инвестиции во вториот квартал ќе биде рекордна.

– Само во април имаме реализација на капитални инвестиции во износ од 464,45 милиони денари, што е највисока априлска реализација споредено со која било година досега. Заклучно со 8 мај 2026 година, односно за период од само четири месеци и осум дена, реализацијата на капиталните инвестиции изнесува повеќе од 480 милиони денари, со што веќе се реализирани 26 % од вкупно планираните капитални инвестиции. За споредба, во првите четири месеци од 2026 година имаме подобра реализација од цел втор квартал, односно од првите шест месеци во повеќе претходни години: во 2025 година реализацијата изнесувала 463 милиони денари, во 2024 година 385,4 милиони денари, во 2023 година 420,5 милиони денари, а во 2022 година – 368,4 милиони денари. Тоа значи дека за само четири месеци веќе сме надминале цели шестмесечни периоди од претходни години – тврди Ѓорѓиевски.

Тој наведе и дека, паралелно со капиталните инвестиции, се обезбедени средства и за исплата на сите субвенции што се наследени како несработена документација од претходното раководство: субвенции за велосипеди, азбестни покриви, инвертер-клими, чистење оџаци, средношколски стипендии и други мерки важни за граѓаните. Но и дека се обезбедени повеќе од 467,9 милиони денари субвенции за јавните претпријатија: „Паркови и зеленило“, „Комунална хигиена“, „Дрисла“, „Лајка“, „Улици и патишта“ и ЈСП.

– Особено важно е што, покрај Град Скопје, има значително намалување на обврските и кај јавните претпријатија. За само четири-пет месеци, обврските на јавните претпријатија се намалени за околу 38,5 милиони евра. Предводник во ова намалување е ЈП „Водовод и канализација“, каде што се намалени обврските за 1,55 милијарди денари, односно повеќе од 25 милиони евра. Но, намалување на обврските има и кај ЈСП, „Улици и патишта“, „Комунална хигиена“, „Паркови и зеленило“, „Градски паркинг“ и „Дрисла“ – потенцира Ѓорѓиевски.

Градоначалникот истакна дека е воведен ред и во исплатата на платите и оти за само четири-пет месеци, обврските на Град Скопје се намалени за околу 11,6 милиони евра, додека тековните обврски на Градот се намалени за околу 5,5 милиони евра, а кредитните задолжувања се намалени за околу 2,2 милиони евра. Притоа биле исплатени 0,9 милиони евра долгови за експропријација, но и 2,5 милиони евра за тужени обврски, додека дополнително биле исплатени речиси 0,5 милиони евра преземени обврски по основ на субвенции, пензионирања, помош, комисии, управни и надзорни одбори, експропријации и спогодби, а биле префрлени средства и кон градската Изборна комисија.