Гори меѓу сојузниците, Варшава гневна од новиот план на Украина: Ова е ескалација!

Тензиите меѓу Полска и Украина повторно ескалираа откако Канцеларијата на полскиот претседател го критикуваше планот на Володимир Зеленски за воспоставување „Национален пантеон“ и изградба на меморијален комплекс со исто име.

Варшава смета дека ова е уште еден потег што дополнително ги влошува односите меѓу двете земји, а во исто време тврди дека ја потврдува исправноста на одлуката на полскиот претседател да му го одземе на Зеленски највисокото државно одликување.

Портпаролот на Канцеларијата на полскиот претседател, Рафал Лешкевич, за Полското радио изјави дека нацрт-законот за изградба на Националниот пантеон претставува „уште една фаза од ескалација на потезите“ од страна на украинските власти, објавува Киев пост.

Според него, овој потег следува по одлуката во мај, кога Украина именуваше воена единица по припадници на Украинската бунтовничка армија (УПА).

„Воведувањето на законот за Националниот пантеон е уште еден чекор во ескалацијата на дејствијата на украинските власти“, порача Лешкевич.

Варшава: Ова ја потврдува одлуката на претседателот

Полската страна верува дека новиот развој на настаните ја потврдува одлуката на претседателот Карол Навроцки да му го одземе на Зеленски Орденот на Белиот орел, највисокото полско државно одликување.

Во исто време, Лешкевич ги критикуваше и политичарите од владејачката коалиција кои претходно го оспорија потегот на Навроцки, тврдејќи дека сега и тие признаваат дека претседателот бил во право.

Историскиот спор повторно ги затегнува односите

Односите меѓу Киев и Варшава значително се заладија во последните недели откако Украина именуваше специјална воена единица по УНА.

Во Полска, членовите на УНА се сметаат за одговорни за масовни злосторства против полското население во Волин за време на Втората светска војна, додека Украина главно ги смета за борци за национална независност.

Спорот доведе до тоа Навроцки да го одземе државниот медал доделен на Зеленски, по што некои високи украински функционери ги вратија полските медали што претходно ги добија во знак на протест.

Што е Национален пантеон?

Новата контроверзност следеше по поднесувањето на предлог-законот од страна на Зеленски до парламентот за изградба на украинскиот национален пантеон, меморијален комплекс посветен на чествување на истакнати личности од украинската историја.

Шефот на Кабинетот на претседателот на Украина, Кирило Буданов, изјави дека целта на проектот е да се зачува споменот на луѓето кои дале значаен придонес за украинската државност и независност.

Украинските власти нагласуваат дека проектот треба да го зајакне националниот идентитет и да придонесе, како што велат, за враќање на историската правда.

Зеленски го претстави планот за Националниот пантеон за прв пат во април, а проектот треба да започне со повторно погребување на Андриј Мељник и неговата сопруга Софија, чии останки неодамна беа вратени од Луксембург.