Големо истражување во 24 земји: Еден лидер е убедливо најнепопуларен

Глобална анкета во 24 демократски земји покажа исклучително ниска поддршка за еден од водечките европски лидери, додека незадоволството е големо, а политичарите од Азија и Централна Европа се на врвот на листата.

Германскиот канцелар Фридрих Мерц има најниско ниво на поддршка меѓу 24 демократски избрани светски лидери, според анкетата на американскиот институт за анкети „Морнинг Консалт“.

Само 19 проценти од Германците изјавиле дека се задоволни од неговата работа, објавува „Еуроњуз“.

Францускиот претседател Емануел Макрон е на претпоследно место со 18 проценти поддршка и 75 проценти незадоволни.

Мерц, сепак, има највисока стапка на незадоволство, 76 проценти, додека 19 проценти од испитаниците се задоволни од неговата работа. Анкета на агенцијата „Форса“ за РТЛ даде слични резултати, според кои 78 проценти од испитаниците се незадоволни, а 20 проценти се задоволни од работата на канцеларот.

Директорот на „Форса“, Манфред Гилнер, изјави за „Еуроњуз“ дека Мерц е „еден од најнепопуларните политичари во Германија од почетокот на 2000-тите“. Тој додаде дека неговата популарност не се зголемила откако се вратил во политиката и дека за него постојат „големи резерви“, особено кај жените, младите и луѓето од источна Германија. Според Херман Бинкерт од Институтот Инса, причините за незадоволството вклучуваат неисполнети изборни ветувања и негативни економски случувања.

„Ниту конзервативните ниту прогресивните гласачи не се задоволни од политиките на владејачката коалиција“, рече тој. Трамп не е меѓу најлошите. На средината на скалата е турскиот претседател Реџеп Таип Ердоган, со 36 проценти поддршка и 50 проценти незадоволство. Се забележува дека начинот на кој е спроведена анкетата во Турција е нејасен, а некои експерти повеќе не ја сметаат земјата за целосна демократија. Американскиот претседател Доналд Трамп е малку над него со 38 проценти поддршка и 57 проценти незадоволство.

Анкета на списанието „Економист“ покажа слични резултати. На средината на скалата се шпанскиот премиер Педро Санчез (38 проценти „за“, 57 проценти „против“, италијанската премиерка Џорџа Мелони (39 наспроти 55) и аргентинскиот претседател Хавиер Милеи (48 наспроти 49).

Гилнер истакнува дека Германците генерално не се поскептични кон политичкото лидерство од другите нации, туку дека незадоволството е конкретно поврзано со Мерц.

Според анкетите, Мерц сега е помалку популарен од поранешниот канцелар Олаф Шолц, а во неговиот најлош период имал поддршка од 28 проценти.

Највисока поддршка меѓу анализираните лидери има индискиот премиер Нарендра Моди (70 проценти), по него следува јужнокорејскиот претседател Ли Џе-мјунг (63 проценти), додека чешкиот премиер Андреј Бабиш е трет со поддршка од 55 проценти.

Истражувањето на „Морнинг консалт“ се базира на анкети меѓу возрасни испитаници во секоја земја и покажува седумдневен просек на ставови.