Гнев на улиците, „Без кралеви“ ги крена Америка и Европа на нозе: Милиони луѓе побараа крај на политиките на Трамп

Милиони луѓе во САД, во саботата се придружија на протестите против претседателот Доналд Трамп и неговата администрација, изразувајќи го своето незадоволство од војната против Иран, злоупотребата на моќ и полициската бруталност, а протестите се проширија и во Европа. Протести се одржаа во речиси секој поголем град во САД,  вклучувајќи ги Њујорк, Вашингтон, Лос Анџелес, Бостон, Нешвил и Хјустон, но и во помалите градови низ целата земја.

Илјадници луѓе ги преплавија улиците во центарот на Вашингтон, марширајќи низ главниот град. Тие се собраа на скалите од Споменикот на Линколн, носејќи, како и на претходните собири, кукли од Трамп, потпретседателот Џ. Д. Венс и други функционери, и повикувајќи на нивно отстранување и апсење.

Илјадници луѓе го преплавија и Тајмс Сквер во Њујорк, принудувајќи ја полицијата да ги затвори инаку прометните улици. Еден од централните протести се одржа во Минесота, која стана жариште на дебата за имиграциските тактики на администрацијата на Трамп откако федералните агенти застрелаа и убија двајца американски државјани, Рене Никол Гуд и Алекс Прети, во јануари. Нивната смрт предизвика бес низ целата земја.

Ова е трет пат за помалку од една година коалиција од здруженија обединети околу слоганот „Без кралеви“ да ги повика Американците да излезат на улиците. Движењето се етаблираше како најзначаен организатор на протести откако Трамп се врати во Белата куќа. Првата мобилизација во јуни 2025 година – на 79-тиот роденден на американскиот претседател и денот на воената парада во Вашингтон – собра неколку милиони луѓе низ целата земја.

Организаторите велат дека протестираат против политиките на американскиот претседател, вклучувајќи ја војната во Иран, федералната имиграциска контрола и растечките трошоци за живот.

„Трамп сака да нè владее како тиранин. Но, ова е Америка и моќта му припаѓа на народот, а не на самопрогласените кралеви или нивните милијардери сојузници“, рекоа тие.

Во Вашингтон, неколку демонстранти носеа транспаренти со антивоени пораки и симболи на мир, по еден месец војна во Иран.

„Од нашиот последен протест, оваа влада нè турна подлабоко во војна“, предупреди Навид Шах, раководител на Заедничката одбрана, здружение на ветерани кое е членка на коалицијата „Без кралеви“.

„Видовме граѓани убиени на нашите улици од страна на милитаризираните сили. Видовме семејства разделени и имигрантски заедници цел на напади“, додаде ветеранот, осврнувајќи се на настаните што неодамна го потресоа Минеаполис.