Загрепската полиција уапси лажен „колега“ кој со автомобил поминувал на црвено светло со вклучени ротациски светла, се претставувал со лажна значка на криминалистичката полиција и тврдел дека брза на интервенција, а поседувал и други лажни полициски легитимации, маици и рачни радиостаници.
Полицијата соопшти дека 37-годишникот во саботата околу 13:20 часот во Загреб управувал со автомобил „форд“ со загрепски регистарски таблички и двапати поминал на црвено светло на Славонска авенија, на раскрсниците со Чулинечка цеста и Улицата III Ресник.
При запирањето, полицајците утврдиле дека за време на возењето тој имал вклучени сини светлосни знаци вградени во возилото. За време на контролата, му покажал на полицаецот значка налик на значка на криминалистичката полиција и рекол дека брза на интервенција, а потоа на повторено барање ги предал веродостојните лични документи.
Поради поминување на црвено светло и употреба на уреди за давање посебни светлосни и звучни знаци, кои смеат да се вградуваат и користат само во службени возила и возила со право на првенство на минување, против него е поднесен обвинителен предлог до прекршочниот суд.
По спроведената прекршочна постапка, 37-годишникот бил уапсен поради сомнение за фалсификување исправа, а со претрес на неговиот автомобил, домот и други простории што ги користи на подрачјето на Дуго Село биле пронајдени предмети кои, според полицијата, го потврдуваат сомнението дека претходните прекршоци не биле неговите единствени противправни дејствија.
Во автомобилот биле пронајдени две легитимации кои личат на полициски, значка со натпис „криминалистичка полиција“, два сета ЛЕД трепкачи, сино ротациско светло, 34 бланко известувања за сторен прекршок од сообраќајната полиција, три рачни радиостаници, пластифициран натпис „ПОЛИЦИЈА“, две маици со тој натпис и елеци со натпис „Криминалистичка полиција“.
Полицијата пронашла и јакна со натпис „Полиција“ и ознаки на МВР на Република Хрватска, за кои наведува дека не се дел од службената полициска униформа ниту опрема.
Осомничениот е предаден на притворскиот надзорник, а кривичната пријава е поднесена до надлежното државно обвинителство, јавува Хина.
