Германската војска ќе набави евтини крстосувачки ракети за масовна употреба

Германската војска одлучи да набави евтини крстосувачки ракети за масовна употреба – објави началникот на штабот на копнената војска, Кристијан Фројдинг.

– Ќе ги користиме за масовен напад врз цели на оддалеченост од околу 1.500 километри и ќе можеме да вршиме заситување на непријателските системи за противвоздушна одбрана – изјави Фројдинг на парламентарниот собир што во Берлин го организираше Здружението за поддршка на копнената војска, според текстот од говорот во кој новинската агенција дпа имала увид.

Генерал-пополковникот истакна дека оваа способност би била посебно ефикасна во комбинација со конвенционалните крстосувачки ракети.

Фројдинг укажа на потребата од масовно користење со цел заситување на непријателската противвоздушна одбрана, како и на потребата од „системи со висока вредност наменети за цели од стратешко значење“.

Затоа, од гледна точка на копнените сили, било логично американските крстосувачки ракети да ѝ бидат доделени токму на копнената војска, рече тој.

Владата има намера да ги купи тие системи со висока вредност од Соединетите Американски Држави.

Фројдинг не наведе конкретни кандидати за тие евтини системи. Тој изјави дека во моментов се разгледуваат два система достапни на пазарот, но и двата би morale да поминат низ постапка на сертификација за употреба во германските вооружени сили, односно Бундесверот.

– Според тоа, првата испорака од 2027 година во начело е можна и ние сакаме да го постигнеме тоа – изјави Фројдинг.