Французите пронајдоа евтин, а ефикасен начин за борба против жештината

Топлинскиот бран што ја зафати Западна Европа во последните денови беше особено брутален во Франција. Низ целата земја се забележани рекордни температури, а Французите, кои претежно немаат клима уреди во своите домови, наоѓаат различни начини да се разладат.

Еден од овие методи се покажа како исклучително ефикасен и предизвика вистинска лудост. Станува збор за „Блан де Медон“, или ситно дробена креда, која обично се користи за правење бои или како средство за чистење, а во Франција често се користи како премаз на излозите. Сепак, досетливите Французи откриле дека кога се меша со вода, може да се нанесе на прозорците и со тоа да се намали температурата во просториите.

Имено, белиот премаз на стаклото пропушта светлина, но ја рефлектира топлината и ја прави просторијата поудобна за престој.

Решението е толку ефикасно што многу граѓани, како и училишта, посегнале по него. Бидејќи се чини дека ова едноставно, брзо и евтино решение има свои темели во науката. Според Би-Би-Си, белата боја на ѕидовите и покривите има ефект на ладење бидејќи белите површини рефлектираат сончева светлина и топлина.

На пазарот постојат и специјално развиени бели бои кои овозможуваат ефект на максимално намалување на внатрешната температура преку „зрачно ладење“. Една од клучните состојки на оваа боја е калциум карбонат, главната активна состојка во кредата.

Честичките од калциум карбонат добро ја рефлектираат ултравиолетовата и инфрацрвената светлина, а кредата се смета за релативно безопасна во однос на нејзиното влијание врз здравјето и животната средина.

Француските медиуми истакнуваат дека откако овој едноставен трик се прошири на социјалните мрежи, големата побарувачка за Блан де Медон доведе до недостиг низ целата земја.

За оние кои не успеаја да го набават Блан де Медон, постои друга алтернатива која можеби е малку понепријатна на почетокот, но е исто толку ефикасна.

Експеримент од истражувачи од Велика Британија покажа дека јогуртот е исто толку ефикасен во намалувањето на собната температура како и кредата. Тенка фолија од овој млечен производ на прозорците е доволна за да ја намали температурата во просторијата до 3,5 степени.

Иако на почетокот има силен мирис на јогурт и кисело млеко, истражувачите тврдат дека мирисот брзо исчезнува како што јогуртот се суши.