Француски телохранител на богаташи ја дрогирал и силувал сопругата, совети му давал Пелико

Телохранител од Лион, чиј идентитет не е откриен, е изведен пред суд под обвинение за дрогирање и силување на својата партнерка, а според пишувањето на медиумите тој бил во онлајн контакт со Доминик Пелико, кој беше осуден за дрогирање на сопствената сопруга, Жизел Пелико, и за организирање на нејзиното силување.

Француската јавност повторно е потресена од сериозен кривичен случај кој привлече големо внимание поради наводните врски со еден од најпознатите сексуални скандали во земјата. Според информациите објавени од француските медиуми, обвинетиот, чиј идентитет не е јавно објавен, комуницирал со Пелико преку онлајн платформа. Токму ова откритие предизвикало дополнителен интерес кај истражителите кои се обидуваат да утврдат каква била природата и интензитетот на нивната комуникација.

Случајот добива уште поголема тежина поради обвинувањата дека мажот наводно ја дрогирал својата партнерка во период од околу три години. Според обвинителството, жената во тој период често се соочувала со здравствени проблеми, вклучувајќи вртоглавици, губење на свеста и срцеви тегоби, без да знае што ги предизвикува.

Истражните органи сметаат дека обвинетиот се обидувал да добие информации и совети преку контактите со Пелико, кој веќе отслужува долгогодишна затворска казна поради тежок случај што ја шокираше Франција и пошироката јавност.

Одбраната на обвинетиот ги отфрла наводите дека комуникацијата со Пелико претставува доказ за директно влијание или поврзаност со делата за кои се товари неговиот клиент. Адвокатот тврди дека самото постоење на контакт не може автоматски да значи дека обвинетиот ги следел неговите постапки или методи.

Покрај главните обвиненија, во текот на постапката биле изнесени и дополнителни наводи поврзани со недозволени материјали, што дополнително ја усложнува правната ситуација за обвинетиот.

Мажот чие судење започна денес работел како меѓународен телохранител за познати клиенти на филмски фестивали и на патувања низ целиот свет, вклучувајќи ги САД и земјите од Заливот. Тој беше уапсен во 2023 година и е обвинет за дрогирање, силување и снимање на својата долгогодишна партнерка.

Доминик Пелико, еден од најлошите сексуални престапници во модерната француска историја, отслужува 20-годишна затворска казна откако беше прогласен за виновен за дрогирање на својата тогашна сопруга речиси една деценија и за повикување на десетици мажи да ја силуваат во нивниот дом на југот на Франција, објавува „Гардијан“.

Пелико и уште 50 мажи беа осудени во 2024 година во најголемото судење за силување во француската историја. Овој 73-годишник контактирал со мажи преку онлајн чет соба наречена „против нејзината волја“ и ставал апчиња за спиење и лекови за анксиозност во храната и пијалокот на својата сопруга за да ја онесвести.

Неговата сопруга, Жизел Пелико, доби поддршка од целиот свет откако се залагаше за јавно судење за подигање на свеста за употребата на дроги и седативи за силување жени. „Не ние треба да се срамиме, туку тие“, рече таа.