Филков: Реализиран е најобемен законодавен реформски циклус, за две години подготвени триесетина законски решенија

МИНИСТЕРОТ ЗА ПРАВДА ГИ ПРЕЗЕНТИРАШЕ РЕЗУЛТАТИТЕ ОД РАБОТАТА ПРЕД АМБАСАДОРИТЕ НА ЕУ

За помалку од две години се подготвени триесетина законски решенија, а што претставува најобемен законодавен реформски циклус, изјави денеска министерот за правда, Игор Филков. Тој се обрати на брифингот во македонската Влада пред амбасадорите на земјите членки на ЕУ, на кој ги информира за резултатите од спроведувањето на Реформската агенда во областа на владеењето на правото, реализираните законски реформи. Тој зборуваше и за следните чекори во исполнувањето на европските обврски на државата.

Во обраќањето, министерот Филков нагласи дека Министерството за правда, во изминатиот период, реализирало најобемен законодавен реформски циклус, со силна динамика, професионален пристап и целосна посветеност на европската агенда.

– За помалку од две години подготвивме околу триесет законски решенија, од кои тринаесет се директно поврзани со Реформската агенда. Овој законодавен циклус претставува најобемен реформски процес реализиран од Министерството за правда во толку краток период и е јасен доказ за институционалниот капацитет, одговорноста и решителноста со кои се спроведуваат реформите – истакна министерот.

Тој нагласи дека реформите се реализираат во тесна координација со Владата, Европската комисија, експертската јавност и меѓународните партнери, со единствена цел – создавање функционален, ефикасен и европски правосуден систем.

Во соопштението од Министерството за правда се додава дека во рамките на четвртото барање за ослободување средства од Реформската агенда, во областа „Владеење на правото” се следат 17 реформски чекори, при што седум од нив се поврзани со донесување на 13 законски решенија што се во надлежност на Министерството за правда.

Филков информира дека сите законски решенија се подготвени, четири веќе се донесени од Собранието, а останатите се наоѓаат во различни фази од законодавната постапка. Според тековната динамика, ќе биде пријавена реализација на осум реформски чекори, додека за уште два продолжуваат активностите за обезбедување поширока политичка поддршка, пред сè за Законот за јавното обвинителство и Изборниот законик.

– Пред амбасадорите беа презентирани и најзначајните реализирани резултати, меѓу кои донесувањето на новиот Закон за Судскиот совет, целосно усогласен со препораките на Оценската мисија на Европската Унија и Венецијанската комисија, како и новите Закони за судска служба и за јавнообвинителска служба, со кои се гарантираат правата на вработените, се унапредува системот на вработување и се воспоставува правично вреднување на трудот – се вели во соопштението на Министерството за правда за брифингот.

Министерот Филков посочи дека се пополнети сите работни места во Агенцијата за управување со одземен имот, избрани се двајца нови членови на Судскиот совет согласно со новиот закон, додека постапката за избор на третиот член е во завршна фаза. Дополнително, преку платформата на Европската комисија се евидентира континуирано зголемување на бројот на истраги, обвиненија, пресуди, конфискации и случаи на управување со одземен имот во предметите од областа на корупцијата, организираниот криминал и перењето пари. Во завршна фаза се и новиот Закон за јавното обвинителство, Законот за судски буџет, новиот Закон за кривичната постапка и новиот Кривичен законик, со кои ќе се комплетира најобемниот реформски пакет во правосудството во последните години и ќе се воспостави современа правна рамка усогласена со европските стандарди.

– Реформите се инвестиција во иднината на државата. Со нив градиме посилни институции, поефикасно правосудство, повисока доверба кај граѓаните и побрза европска интеграција. Таму каде што е потребен политички консензус, очекувам одговорност и државнички пристап од сите политички чинители, затоа што европските реформи се обврска кон државата и кон идните генерации – порача министерот за правда Игор Филков.