Ф1 под притисок: Верстапен бара промени или ќе си оди!

Сè почести се шпекулациите за евентуално заминување на Макс Верстапен не само од Ред бул туку и воопшто од Формула 1. На оваа тема зборуваше и холандскиот новинар Ерик ван Харен, кој е познат по своите блиски врски со Ред бул и кој беше првиот што ја соопшти веста за заминувањето на шефот на Ред бул, Кристијан Хорнер, минатата година.

Четирикратниот светски шампион беше фрустриран од осмото место на „Сузука“, признавајќи дека ги броел круговите до крајот само за да се ослободи од својот проблематичен болид. Не го криеше своето незадоволство од новите правила воведени оваа година и постојано се жалеше за промените од претсезонските тестирања, нагласувајќи ја својата желба да истражи други гранки на мотоспортот.

Овој пат, проговори и репортерот на „Скај спортс“, Крег Слејтер, кој тврди дека ја истражил заднината на приказните за заминувањето на Верстапен и открил што стои зад неговите коментари. Верува дека со своите изјави Верстапен повеќе се обидува да влијае на насоката во која се движи спортот отколку да го најави своето конечно заминување.

• Во моментов, тој не е задоволен од својот тркачки живот. Има проблеми со поставките на сегашните болиди. Но, она што е охрабрувачко за Формула 1 е тоа што сака да соработува со ФИА за да ги подобри работите. Тој смета дека батеријата има премногу влијание врз начинот на кој се одвиваат трките сега. Тоа малку го одвраќа. Имаше прашалници за неговата иднина во спортот. По трката, тој даде еден или два одговори каде што навести дека неговиот ум е на друго место наместо во Формула 1 – истакна инсајдерот Слејтер.

Поради откажувањето на трките во Бахреин и во Саудиска Арабија, Формула 1 има петнеделна пауза во календарот до Големата награда на Мајами, на 3 мај. Слејтер верува дека овој пат ќе му овозможи на Верстапен внимателно да размисли за иднината и е оптимист дека ќе се премисли за пензионирањето.

• Всушност, разговарав со некои колеги, холандски новинари, кои рекоа дека тој не зборувал конкретно за напуштање на спортот, туку дека рекол дека имал многу време за размислување во текот на оваа принудна пауза. И дека животот е нешто повеќе од Формула. Неодамна стана татко, па затоа неговиот живот се промени. Но, мислам дека тој, како возач број еден во Ф1 и најголем талент во спортот во моментов, ја гледа својата позиција како можност да влијае на насоката во која мисли дека треба да се движи чистото натпреварување. Да се ​​надеваме дека ќе остане во спортот. Но, можеби, ќе иницира промена за да го врати спортот кон она што треба да биде; предизвик за возачот и болидот до крајни граници – заклучи Слејтер.

Во договорот на Верстапен со Ред бул постои клаузула што му дозволува да ја прекине соработката ако е трет или пониско во пласманот на возачи до летната пауза во август. Со оглед на тоа што дуото на Мерцедес, Џорџ Расел и Кими Антонели, имаа одличен почеток на сезоната, Верстапен моментно е осми и ќе има тешка задача да се пробие меѓу првите двајца, дури и ако успее Ред бул да го среди неговиот болид целосно.

Иако, веројатно, ќе има можност да го напушти својот сегашен тим, се очекува да остане во спортот, без оглед на мислењето за сегашните правила.