Европа во криза: Летните одмори под знак прашање, можеби ќе треба да ги менувате плановите?

Високи европски претставници за енергетика и воздухопловство предупредија дека „ценовната криза“ ќе се претвори во „криза на снабдување“ ако Ормускиот теснец остане затворен.

ЕУ предупреди дека Европа е во „многу сериозна криза“ бидејќи залихите на гориво за авиони почнуваат да се намалуваат поради војната во Иран, а луѓето можеби ќе мора да ги променат своите планови за одмор ова лето.

„За жал, многу е веројатно дека многу луѓе ќе бидат погодени, или од откажувања на летови или од многу, многу скапи билети“, изјави за Скај њуз Ден Јоргенсен, европски комесар за енергетика.

„Дури и да направиме сè што можеме, ако нема гориво за авиони, навистина го нема. Во моментов тоа е првенствено ценовна криза, сè уште не криза на снабдување, но за жал не можеме да бидеме сигурни дека ќе спречиме криза на снабдување, особено кога станува збор за гориво за авиони, ако кризата продолжи“, додаде Јоргенсен.

Меѓународната агенција за енергија предупреди дека во следните пет до шест недели би можеле да се појават големи проблеми со снабдувањето.

Авиокомпаниите веќе преземаат мерки за намалување на побарувачката: Lufthansa Group, една од најголемите европски авиокомпании, објави откажување на 20.000 летови во наредните месеци. Други авиокомпании ги зголемуваат цените на летовите на долги релации за да ги покријат повисоките трошоци за гориво.

„Доколку утре има мир и се отвори Ормускиот теснец, мислам дека би можеле да го избегнеме тоа, но морам да кажам дека дури и во најдобар случај, кризата со цените ќе продолжи уште некое време“, предупреди Јоргенсен.

Гасовната инфраструктура е уништена до тој степен што ќе бидат потребни години за нејзина обнова, што значи дека со месеци, а можеби и со години, ќе имаме значително повисоки цени отколку пред почетокот на оваа криза.

Шефот на италијанската Агенција за цивилно воздухопловство изјави за Sky News дека луѓето треба да размислат да ги поминат летните одмори во своите матични земји.

„Во минатото, цените на горивата достигнуваа и надминуваа 100 долари без значителни последици за воздушниот сообраќај, но овој пат психолошкиот ефект има разорно влијание врз патниците“, предупреди Пјерлуиџи ди Палма.

„Најдобро е да се препорачаат одмори во близина, повторно откривајќи ги прекрасните дестинации во нашата земја.“

„За оние кои сè уште сакаат да одат на долги патувања, добро е да размислат за посебни осигурувања кои можат да обезбедат сигурност во форма на гарантирано враќање на парите во случај на доцнење или откажување на летови.“

ЕУ објави мерки за ублажување на ефектите од енергетската криза, вклучувајќи планови за забрзување на употребата на обновливи извори на енергија и стимулации за домаќинствата да инсталираат чисти извори на енергија како што се топлински пумпи и соларни панели.

ЕУ, исто така, ги охрабрува земјите-членки да ги намалат даноците на електрична енергија за да охрабрат повеќе луѓе да купуваат електрични возила.