ЕУ го одложи продолжувањето на санкциите против Русија

Земјите од ЕУ често расправаат за продолжувањето на санкциите против Русија до самиот последен момент.

Амбасадорите на Европската унија денеска се согласија да ги продолжат санкциите против илјадници руски поединци и компании за само една недела, со цел да се решат несогласувањата околу нивното продолжување за шест месеци, соопшти портпарол на ирското претседателство со ЕУ.

Тој изјави дека санкциите се продолжени за седум дена за да им се даде дополнително време на земјите-членки сеопфатно да ги разгледаат предлозите за нивно продолжување.

Амбасадорите на ЕУ имаа рок до утре да постигнат договор за продолжување на тековните санкции, но не успеаја да се договорат дали руско-узбекистанскиот милијардер Алишер Усманов треба да биде отстранет од списокот со санкции, пренесува Ројтерс.

Франција и Словачка се залагаат за негово отстранување од списокот, наведувајќи „загриженост за националната безбедност“, изјавија европски дипломати.

Санкциите, кои опфаќаат речиси 3.000 компании и поединци, требаше да истечат на 15 септември, но рокот беше продолжен за да се овозможи дополнително разгледување на предлозите за нивно продолжување.

За санкциите на ЕУ е потребно едногласно одобрение од сите 27 земји-членки и тие мора да се продолжуваат на секои шест месеци.

Според Индексот на милијардери на „Блумберг“, на почетокот на 2026 година, нето-богатството на Усманов се проценувало на 18,8 милијарди долари. Тој покрена бројни правни постапки во Европа со крајна цел да се укинат санкциите против него.

Земјите од ЕУ често расправаат за продолжувањето на санкциите против Русија до последен момент – ситуација што во минатото главно беше поттикната од барањата на унгарскиот лидер Виктор Орбан и на Словачка, која одржува подобри односи со Москва отколку повеќето други земји од ЕУ.

Во јуни, земјите од ЕУ за првпат се согласија да ги продолжат секторските санкции на блокот – како оние насочени кон енергетскиот сектор – за период од една година, со цел да се намали веројатноста за такви дебати.

Првичните широки економски и секторски санкции на ЕУ против Русија беа воведени во јули 2014 година како директен одговор на руската анексија на Крим во март истата година и ескалацијата на конфликтот во источна Украина, пренесува „Танјуг“.

По започнувањето на воената операција на Русија во Украина на 24 февруари 2022 година, ЕУ – заедно со САД, Обединетото Кралство и другите партнери од Г7 – воведе најстроги и најопсежни пакети санкции во поновата историја.