Европскиот парламент утре ќе расправа за величањето на воениот злосторник Младиќ во Србија

Пратениците во Европскиот парламент и претставниците на Европската комисија утре ќе расправаат за величањето на воените злосторства во Србија – конкретно во контекст на погребот на осудениот воен злосторник Ратко Младиќ – официјално соопшти ЕП. Европскиот парламент забележува дека „неколку илјади луѓе се собраа во српскиот главен град, Белград, на погребот на Младиќ, кој почина на 84-годишна возраст додека ја издржуваше казната доживотен затвор во затвор на Обединетите нации во Хаг, Холандија“, пренесува „Савремена политика“.

„Младиќ беше осуден за геноцид од страна на трибуналот на ОН за воени злосторства поради неговата улога во масакрот во Сребреница во 1995 година, во кој беа убиени речиси 8.000 Бошњаци, вклучително и момчиња. Еден министер од српската влада првично најави дека за Младиќ ќе се организира погреб со државни почести, но тие планови подоцна беа изменети по реакциите од неколку европски лидери. И покрај пресудата на судот на ОН од 2017 година, одредени делови од српската јавност и политичкиот естаблишмент продолжуваат да го сметаат Младиќ за херој“, наведува Европскиот парламент.

Инаку, лидерите на Европската унија и на земјите-членки остро ја осудија Србија за организирањето на погребот на Ратко Младиќ, кој вклучуваше државна поддршка и воени почести. Според официјалните изјави, величањето на такви поединци, историскиот ревизионизам или негирањето на геноцидот ги кршат основните европски вредности и немаат место во земјите што се стремат кон членство во ЕУ.

Погребот на Младиќ, одржан на 7 септември, беше формално организиран од неговото семејство, но српската влада обезбеди логистичка поддршка, транспорт и обезбедување. Министерот за правда Ненад Вујиќ првично најави дека Младиќ ќе добие државни и воени почести, иако претседателот Александар Вучиќ подоцна изјави дека семејството ќе одлучува за деталите околу погребот.

Сепак, на погребот присуствуваа неколку високи српски министри – вклучително и министрите за правда, одбрана, култура и јавни инвестиции – како и синот на Вучиќ. Вучиќ одлучи лично да не присуствува на погребот, но нагласи дека „направил сè што е неопходно и можно за да се осигура дека погребот ќе се одржи достоинствено, сериозно и одговорно“.

Посмртните останки на Младиќ беа пренесени со авион на српската влада од Хаг во Белград на 3 септември.