Естонија нема да им дозволи на руските и белоруските спортисти да се натпреваруваат на нејзина територија

Естонија стана четвртата земја што одлучи да не им дозволи на руските и белоруските спортисти да се натпреваруваат на нејзина територија, со оглед на војната во Украина.

Слични одлуки претходно донесоа Норвешка, Финска и Канада, објави денеска „Би-би-си“ (BBC). Овие потези доаѓаат по сè погласните критики во врска со повторното вклучување на спортисти од Русија и Белорусија во меѓународните натпреварувања. Во септември, Меѓународната скијачка федерација (ФИС – FIS) ги олесни своите правила, објавувајќи дека на спортистите од тие две земји ќе им биде дозволено да учествуваат на нејзините натпревари, под услов да потпишат изјава за неутралност.

Претходно, спортистите од Русија и Белорусија подлежеа на построги проверки, при што се испитуваа можните доброволни врски со војската или вршењето платена воена служба.

Нивното учество останува ограничено само на поединечни дисциплини, а на спортистите им е забрането да истакнуваат национални симболи или знамиња, да пуштаат национални химни или да носат национални обележја на својата опрема.

Владата на Естонија испрати писмо до ФИС, во кое наведува дека дозволувањето влез на натпреварувачи од Русија и Белорусија би ја „поткопало поддршката на земјата за Украина и би создало простор за пропаганда“.

Во писмо доставено до „Би-би-си“ (BBC), ФИС (FIS) наведува дека организацијата е посветена на давање целосна поддршка на спортистите, федерациите и локалните организатори во справувањето со ситуацијата, за која се признава дека е исклучително сложена.

„Сепак, политиката во однос на учеството на поединечни неутрални спортисти јасно предвидува дека, без оглед на тоа дали се исполнети условите за натпреварување, прописите на земјата домаќин кои се однесуваат на издавањето визи и влезот на нејзина територија – прашања за кои одлучува исклучиво таа земја – остануваат на сила. ФИС не сноси никаква одговорност доколку на некое лице, на кое му е дадена дозвола за учество според правилата за поединечни неутрални спортисти, му биде одбиена виза или влез во земјата“, се вели во писмото, пренесува „Бета“.