Ердоган го предупреди Трамп, Анкара нема да се двоуми да интервенира!

Претседателот на Турција, Реџеп Таип Ердоган директно го предупредил американскиот претседател Доналд Трамп дека Анкара ќе интервенира доколку курдски организации се вклучат во конфликтот, наведува новинарот на весникот „Туркије“, Јуџел Кајаоглу, повикувајќи се на безбедносни и политички извори.

Според овие наводи, од почетокот на американско-израелската кампања на 28 февруари, Израел се обидел да ги користи ПКК и ПЈАК како копнени сили против Иран, а израелската разузнавачка служба Мосад контактирала со нивните лидери во северен Ирак и во Иран.

Откако беа забележани одредени случувања на терен, Турција брзо реагираше.

„Во телефонски разговор на почетокот на март, Ердоган му стави до знаење на Трамп дека Анкара се спротивставува на вклучувањето на курдските милитантни групи во војна против Иран и дека цврсто стои зад територијалниот интегритет на Иран“, велат изворите.

Турција одговори на четири нивоа истовремено. Министерот за надворешни работи Хакан Фидан и шефот на разузнавањето на МИТ, Ибрахим Калин, беа во интензивен контакт со властите на Регионалната влада на Курдистан (KRG) во северен Ирак, како и со ирачката централна влада, со што ја разјаснија позицијата на Анкара.

Делегација составена од претставници на Министерството за надворешни работи, МИТ и политички претставници, исто така, отпатува во северен Ирак, каде што предупредија дека Турција ќе интервенира доколку овие организации се вклучат во конфликтот, без оглед на каков било мировен процес.

„Видовте што се случи во Сирија. Ние ќе го сториме истото тука. Нема да чекаме никаков процес. Ќе одговориме без одлагање на секој чекор што би можел да го запали регионот“, порача делегацијата, според извештајот.