Ефикасниот даночен систем клучен за намалување на сивата економија

Дигитализацијата на даночните процеси, електронската размена на податоци, анализата на ризик и целните контроли се меѓу клучните инструменти за зголемување на даночната усогласеност, намалување на неформалната економија и за унапредување на даночната правичност. Ова беше истакнато на меѓународната академска конференција „Даночна политика, нееднаквост и неформална економија“, која се одржа од 11 до 13 септември, во Охрид, во рамките на проектот „Иновативни научни решенија за намалување на социјалната нееднаквост и неформалната економија во Република Македонија преку даночна регулатива“.

На конференцијата учествуваа професори и истражувачи од Македонија, Србија, Хрватска, Бугарија, Полска, Шведска и од други земји, кои ги споделија реформските искуства и добрите практики за создавање поефикасен и поправеден даночен систем.

Директорката на Управата за јавни приходи, Елена Петрова, посочи дека не треба да се гледа дигитализацијата само како инструмент за контрола туку и како начин за намалување на трошокот на усогласеноста за даночните обврзници.

– Дигитализацијата не треба да ја гледаме само како инструмент за контрола. Таа треба да го намалува и трошокот на усогласеноста за даночниот обврзник – рече Петрова.

Таа нагласи и дека податоците со кои располага УЈП може да им помогнат на креаторите на политиките при процената на постојните и воведувањето нови даночни мерки, со цел системот да биде поправеден и да не генерира социјална нееднаквост.

На конференцијата беше истакнато и значењето на довербата и на доброволното даночно усогласување за одржлив даночен систем и фер деловно опкружување.

– Доброволното почитување не може да се изгради само со контрола и санкции. Потребна е доверба дека се фер правилата, дека се применуваат еднакво и дека е заштитен формалниот бизнис од нелојалната конкуренција – истакна Петрова.