Двајца поранешни унгарски министри приведени поради сомнение за злоупотреба на над 79 милиони евра

Двајца поранешни унгарски министри се приведени под сомнение за злоупотреба на десетици милиони евра јавни средства и примање поткуп, само неколку часа откако парламентот им го одзеде пратеничкиот имунитет.

Балаж Ханко, поранешен министер за култура во владата на Виктор Орбан и пратеник од редовите на „Фидес“, е приведен под сомнение за проневера на јавни средства – обвинение што тој го негира. Истиот ден, Миклош Сестак – поранешен министер за национален развој и пратеник од КДНП – исто така беше приведен во врска со посебна истрага за наводен поткуп.

И тој негира каква било незаконска активност.

Ханко е осомничен дека го надгледувал незаконското користење на околу 17,3 милијарди форинти (приближно 47 милиони евра) од Националниот фонд за култура. Обвинителите се сомневаат дека парите биле пренасочувани кон уметници и организации блиски до Фидес, како и дека биле користени за финансирање на изборната кампања на партијата за 2026 година.

Пред приведувањето, Ханко изјави дека неговата „совест е чиста“ и го опиша случајот како „политички мотивиран кривичен прогон“, пренесува Nova.rs.

Сестак е осомничен за примање поткуп и провизии во вредност од над 12 милиони форинти (околу 32,6 милиони евра) поврзани со набавка на возила за државната автобуска компанија и со јавни градежни проекти. Истрагата се фокусира на купувањето половни автобуси кои наводно биле платени по надуени цени. Апсењата уследија по одлуката на парламентот да им го укине имунитетот на Ханко и Сестак, како и на премиерот Петер Маѓар, кој сам побара укинување на својот имунитет за да може – како што рече – да одговори на обвинувањата што ги смета за политички мотивирани.

Маѓар, чија партија „Тиса“ победи на априлските избори со ветување дека ќе ја истражи наводната корупција за време на 16-годишното владеење на Орбан, го опиша ова како клучен момент за земјата.

„По децении лаги, милиони Унгарци за првпат можат да видат што навистина значат промената на режимот и еднаквоста пред законот“, изјави Маѓар. Приведувањата се дел од поширока антикорупциска кампања на новата унгарска влада. Канцеларијата за заштита и повраток на државниот имот веќе најави истраги за наводна продажба на политичко влијание, локални јавни набавки, државни инвестиции и трошоци за пропаганда.