До 18 часот во Македонија локализирани шест пожари – четири од нив се изгаснати

На територијата на Македонија до 18 часот денеска се регистрирани вкупно шест пожари на отворен простор. Според податоците од надлежните служби, еден пожар сè уште е активен, еден е ставен под контрола, а четири се целосно изгаснати.

Активен останува пожарот во гостиварскиот регион, во близина на селото Чегране, каде што се зафатени ниска вегетација и грмушки.

Под контрола е ставен пожарот кај селото Железница во Општина Кратово, каде што горела депонија.

Во текот на денот пожарникарите успешно интервенирале и целосно ги изгаснале пожарите во повеќе општини низ државата.

Меѓу нив е пожарот меѓу селата Муртино и Банско во струмичкиот регион, каде што биле зафатени ѓубре, ниска вегетација и шибје. Изгаснат е и пожарот во Општина Теарце, во близина на бензинската пумпа „Стјудес Петрол“, каде што горела ниска вегетација.

Под контрола се ставени и пожарите на потегот меѓу селата Панчарево и Црник во Општина Пехчево, како и кај селото Долно Дуќани во велешкиот регион.

Надлежните служби и понатаму внимателно ја следат состојбата на терен, особено поради високите температури и зголемениот ризик од избувнување пожари.

Од институциите апелираат граѓаните да бидат особено внимателни при движење и престој на отворен простор и да избегнуваат активности што можат да предизвикаат пожар.