Дивата депонија во Сарај ќе прерасне во модерен парк

Просторот покрај реката Вардар, на патот кон селото Рашче, место што до вчера беше запуштено, претворено во дива депонија, сега се чисти и се подготвува да прерасне во модерен парк.

Како што најави скопскиот градоначалник, Орце Ѓорѓиевски, просторот хортикултурно и партерно ќе се уреди, а ќе има и зелени површини, како и содржини за рекреација, одмор и дружење на жителите од овој дел на Сарај.

Воедно, градските власти обелоденија дека наскоро ќе почнат и со реконструкција на мегапаркот во Сарај, кој, како што нагласија, со децении бил оставен во негрижа.

– Ова место има природна убавина, има потенцијал и заслужува грижа. Не заслужува отпад, запуштеност и заборав, туку живот, зеленило и простор во кој ќе уживаат граѓаните. Вложуваме во секој дел од Скопје, затоа што сите наши сограѓани заслужуваат еднакви услови, уредена околина и подобар квалитет на живот – истакна Ѓорѓиевски, потсетувајќи дека обврска на сите е да го чуваат секој уреден простор како свој дом.