Детско однесување, фудбалот не функционира така

Рој Кин, поранешниот капитен на Манчестер Јунајтед, остро ги критикуваше оставките на Паоло Малдини и Леонардо, нарекувајќи ги нивните постапки детски. „Воопшто не ми се допаѓа тоа. Тоа е детско однесување. Не напуштате проект само затоа што не сте го добиле тренерот што го посакувавте. Фудбалот не функционира така“, рече Кин.

Само за потцетување, Малдини и Леонардо ја напуштија Италијанската фудбалска федерација (FIGC) само 16 дена откако ги презедоа своите нови позиции. Според италијанските медиуми, причината за нивното заминување беа несогласувањата околу изборот на нов селектор на репрезентацијата. Одлуката за заминување доаѓа откако тие официјално беа назначени на позиции што требаше да го модернизираат италијанскиот фудбал на 11 јули.

„Секогаш се зборува за лојалност и принципи, и тоа е во ред. Секој има право на свое мислење и треба да го брани. Но, кога се донесува одлука, мора да се продолжи со работата. Тоа е квалитетот на лидерите. Тие не се намуртени како деца само затоа што работите не одат по нивно“, додаде тој.

Нивните улоги ги дизајнираше новиот претседател на Федерацијата, Џовани Малаго. Тој ја создаде позицијата технички директор за да му даде на националниот тим поголема автономија и подобра организациска структура. Целта беше да се поврзат различните возрасни групи на младинските тимови и академии и да се создаде препознатлив идентитет за италијанскиот фудбал.

Првите проблеми се појавија за време на потрагата по нов селектор. Откако Карло Анчелоти и Пеп Гвардиола, кои беа главни кандидати, ги отфрлија понудите, изборот падна на Андреа Пирло. Сепак, и овој план беше отфрлен откако беше откриено дека Пирло е глобален амбасадор на руската компанија за обложување Фонбет.

„Малдини и Леонардо се легенди. Нивните играчки кариери се несомнени, но не станува збор за стара слава, туку за одговорност. Италијанскиот фудбал се опоравува од тешки години и им беа потребни експерти за да помогнат во стабилизирањето на системот. Нивното заминување по само неколку недели е лош сигнал за сите“, заклучи Кин.