Дали навистина е постигнат значаен договор? Од Киев пристигна неочекувана порака

Американскиот претседател Доналд Трамп објави дека Русија и Украина постигнале договор за прекин на нападите врз енергетските капацитети, но од Киев засега доаѓа сосема поинаква порака. Украинските власти тврдат дека не им е познат таков договор, додека претседателот Володимир Зеленски вели дека не е сигурен дали Москва воопшто би го почитувала.

Трамп на платформата Truth Social објави: „Украина се согласи да не ги напаѓа руските енергетски капацитети. Русија се согласи на истото!“.

Истовремено, тој за растот на глобалните цени на дизелот повторно ја обвини војната во Украина, а не конфликтот на Блискиот Исток. „Глобалниот раст на цените на дизелот главно е предизвикан од војната меѓу Русија и Украина, а не од војната со Иран“, напиша Трамп.

Киев не потврди дека постои договор

Ниту украинската, ниту руската страна засега не потврдија дека е постигнат таков договор каков што опишува Трамп. Околу еден час по неговата објава се огласи Зеленски, кој изрази сомнеж дека Русија би го почитувала таквиот договор.

„Ако партнерите се подготвени да гарантираат дека Русија навистина нема намера да ја напаѓа нашата електроенергетска мрежа, останатите енергетски капацитети, клучната инфраструктура и транспортот на храна, тогаш и ние, се разбира, сме подготвени да обезбедиме да нема напади ниту од наша страна“, напиша Зеленски на Телеграм.

Украинскиот претседател порача дека војната мора да заврши и дека договорот за прекин на нападите врз клучната инфраструктура би можел да биде прв чекор кон смирување на конфликтот и конечен мир.

„Ги чекаме деталите од нашите партнери“, заклучи тој.

Дополнителен сомнеж за постоењето на договорот предизвика изјавата на висок украински функционер од енергетскиот сектор. Тој, под услов да остане анонимен, за „Киев Индепендант“ изјави дека во Киев не слушнале за никакво енергетско примирје.

Трамп го критикуваше Зеленски поради цените на горивото

Најновата објава на Трамп дојде само еден ден откако тој за растот на цените на дизелот директно го обвини Зеленски.

Во САД цената на дизелот за време на викендот достигна рекордни 6,23 долари за галон, а Трамп тврди дека за тоа придонеле украинските напади врз руската енергетска инфраструктура.

„Зеленски мора да направи една работа. Мора да престане да ги уништува залихите на дизел во Русија“, рече Трамп.

„Нека гаѓа други цели, но не дизел, бидејќи со тоа предизвикува недостиг. Разговаравме за тоа со Зеленски. Ова не го предизвика Блискиот Исток“, додаде тој.

Идејата за енергетско примирје се појавуваше и претходно 

Ова не е првпат да се разгледува можноста за ограничено примирје што би ги опфатило енергетските објекти. Предлогот Русија и Украина да престанат меѓусебно да си ја напаѓаат енергетската инфраструктура се појавуваше и за време на неуспешните мировни преговори кои во летото 2025 година се обидуваше да ги посредува администрацијата на Трамп.

Зеленски уште вчера најави дека за можното запирање на руските и украинските напади врз енергетската инфраструктура и во Црното Море би можел да разговара токму со Трамп.

„Отворени сме за поморско примирје, како и за енергетско примирје. Планирам да разговарам за сето тоа“, изјави Зеленски во интервју за украинската национална телевизија.

Трамп и Зеленски би можеле да се сретнат во Њујорк

Можната средба меѓу Трамп и Зеленски би можела да се одржи на маргините на Генералното собрание на Обединетите нации меѓу 21 и 23 септември, доколку се усогласат распоредите на двајцата претседатели.

Разговорите би се одвивале во момент кога американските обиди за постигнување поширок мировен договор и понатаму се блокирани, првенствено поради руските барања поврзани со територијата.

Доколку се одржи средбата, енергетското примирје би можело да биде една од темите на разговор, уште повеќе што Трамп веќе јавно изврши притисок врз Киев да престане да ја напаѓа руската енергетска инфраструктура.