Се зголемуваат шансите за остра и снежна зима – прогнозата се смени!

Српскиот метеоролог Иван Ристиќ предупредува дека се зголемуваат шансите претстојната зима да биде постудена и со повеќе снег, а еден од факторите би можел да биде влијанието на силниот Ел Нињо врз атмосферските обрасци над Атлантикот.

Ристиќ објаснува дека циклоните кои во текот на зимата носат големи затоплувања, познати како „winter killer“ системи, често потекнуваат од областите каде што се создаваат ураганите.

Според него, силниот Ел Нињо би можел да влијае врз атмосферската циркулација на начин што ќе го ограничи развојот на тропската активност над Атлантикот.

Како што наведува Ристиќ, анализата на порталот „Severe Weather Europe“ покажува дека атмосферските услови во текот на октомври би можеле да бидат многу неповолни за развој на тропски системи над Атлантикот. Наместо вообичаеното зголемување на активноста кон крајот на сезоната на урагани, се очекува образец кој би можел значително да ја ограничи.

– Прогнозата на аномалиите на температурата на морето за октомври, која ја објавува NMME, покажува изразено топла аномалија поврзана со Супер Ел Нињо. Во централниот дел од оваа аномалија температурите на морската површина надминуваат 5 степени над просекот, што одговара на многу силен Ел Нињо – вели Ристиќ.

Токму ваквиот атмосферски образец, според него, би можел да биде еден од факторите за претстојната зима да донесе повеќе студени и снежни периоди, односно помалку зимски затоплувања кои ги прекинуваат студените бранови.

Сепак, станува збор за долгорочна проценка, па посигурна слика за карактерот на зимата ќе може да се добие во следните месеци, како што ќе се приближуваме до зимскиот период.