Цените на нафтата паднаа откако Иран објави крај на воените операции против Израел

Цените на нафтата на светските пазари паднаа денес откако Иран објави дека ги завршил воените операции против Израел, што ги намали стравувањата од понатамошно ширење на конфликтот на Блискиот Исток.

Нафтата „Брент“ се тргуваше по околу 94 долари за барел, откако достигна повеќе од 98 долари во текот на денот, додека американската сурова нафта WTI падна на околу 91 долар од претходните 95 долари за барел, објави „Трејдинг економикс“.

Дополнителен поттик за смирување на пазарот даде изјавата на американскиот претседател Доналд Трамп дека Иран и Израел се блиску до нов договор за прекин на огнот, како и дека има напредок во контактите меѓу Вашингтон и Техеран.

Се проценува дека намалувањето на тензиите би можело да ги елиминира ризиците за навигација и извоз на енергија преку Персискиот Залив, еден од најважните светски транспортни правци за нафта.

Израел, исто така, сигнализираше дека е подготвен привремено да ги прекине воените активности, откако размената на удари во текот на викендот предизвика силни осцилации на енергетските пазари и поттикна зголемување на цените за време на азиското тргување. Во исто време, Организацијата на земјите извознички на нафта (ОПЕК Плус) одобри зголемување на производствените квоти за јули за 188.000 барели дневно, што дополнително придонесе за намалување на загриженоста за евентуален недостиг на пазарот, пренесува „Танјуг“.

Ценовните движења беа под влијание и на новите податоци од Кина, кои укажуваат на значителен пад на увозот на сурова нафта. Аналитичарите велат дека Кина, како најголем увозник на нафта во Азија, во последните недели повеќе се потпираше на постојните залихи, што го намали притисокот врз глобалната побарувачка.