Четири цени за еден производ?! Нови правила стапуваат на сила од 1 октомври во Хрватска

Хрватската комора на занаетчии објави упатства за новите правила за цените кои започнуваат да важат од 1 октомври, а трговците и давателите на услуги предупредуваат дека рокот за прилагодување е премногу краток.

Според новите правила, покрај тековната цена на производот или услугата, ќе мора јасно да биде истакната и дополнителна, таканаречена референтна цена (сидрена цена).

За повеќето стоки и услуги референтен датум е 10 септември оваа година, додека за храна, пијалаци, козметика, средства за чистење, тоалетни потреби и производи за домаќинство и понатаму се користи цената што важеше на 2 мај 2025 година.

Хрватската комора на занаетчии наведува дека референтната цена не го заменува правилото за најниската цена во претходните 30 дена, која се прикажува при намалување. Поради тоа, кај одредени производи на акција истовремено можат да се појават и четири цени.

Претседателката на Секцијата на сметководители при ХКЗ, Ѓурѓица Мостарчиќ, изјави за ХРТ: „Одлуките беа донесени прилично брзо и не им претходеше советување“, додавајќи дека за прилагодување остана исклучително малку време.

Комората дополнително појасни дека за производ кој на 10 септември не бил на залиха, но бил дел од асортиманот, се користи цената евидентирана во ценовникот или во системот на тој ден.

За новите производи и услуги воведени по тој датум се препорачува евидентирање на цената при првото појавување и чување доказ за тоа. Особено се чувствителни услугите со индивидуално договорени цени, како што се кетеринг, свадби и приеми.

Дополнителна обврска се однесува и на онлајн купувањето. Трговците и давателите на услуги кои имаат сопствена веб-страница ќе мора да објавуваат ценовници во XML или CSV формат погоден за автоматска обработка, а не во PDF, Word или Excel. За стоката ценовникот мора да се ажурира секој ден, најдоцна до осум часот, додека давателите на услуги мора да го сторат тоа по секоја промена на цените.