Две лица, еден хрватски и еден црногорски државјанин, загинаа кога автобус на „Ниш експрес“ се преврте во близина на Загреб, потврди денеска за новинската агенција „Бета“ Министерството за надворешни и европски работи на Хрватска.
Несреќата се случила утрово, околу 7:25 часот, кога автобус со српски регистарски таблички се превртел на автопатот во близина на клучката Иваниќ-Град, во правец кон Загреб. Две лица загинаа, шест се здобија со тешки, а 27 со полесни телесни повреди.
Повредените патници се пренесени во неколку болници во Загреб, каде што им се укажува потребната медицинска помош. Според последните информации, никој од нив не е во животна опасност.
Во тек е истрага за несреќата.
