Бродот со хантавирус ќе пристигне во Тенерифе утре – генералниот директор на СЗО патува на Канарските острови

Крузерот MV Hondius, на кој тројца патници починаа од хантавирус, треба да пристигне на шпанскиот остров Тенерифе рано утре, соопшти операторот на крстарења.

„Подготовките во врска со нашата дестинација, процедурите за карантин и скрининг за сите гости, како и плановите за понатамошно патување за сите патници и засегнатиот екипаж ги водат организации од голем број земји“, се вели во соопштението на Oceanwide Expeditions.

Ова ги вклучува Светската здравствена организација (СЗО) и холандските власти, а компанијата исто така тесно соработува со шпанските власти, додаде таа.

Крузерот MV Hondius, кој плови под холандско знаме, немал сомнителни случаи меѓу 147 патници на бродот од четврток, според ажурирање од СЗО. Сепак, периодот на инкубација, кој може да трае до шест недели, бара претпазливост.

По пристанувањето во пристаништето Гранадиља во Тенерифе, властите ќе ја преземат одговорноста за медицинските процедури и потенцијалното враќање на патниците дома, соопшти „Оушнвајд експедишн“.

Соединетите Американски Држави во петокот објавија дека ќе ги евакуираат американските патници со авион.

Три лица, постара холандска двојка и Германка, починаа по епидемијата на мал крузер кој исплови од јужна Аргентина на 1 април со помалку од 150 лица на бродот.

СЗО во петокот објави шест потврдени случаи на хантавирус, вклучувајќи три смртни случаи, меѓу осумте сомнителни случаи.

Генералниот директор на СЗО, Тедрос Аданом Гебрејесус, во сабота патува на Канарските Острови за да ја координира евакуацијата на патниците од бродот.

Гебрејесус ќе биде придружуван од шпанските министри за здравство и внатрешни работи, „за да се обезбеди координација меѓу владините агенции, следење на здравјето и спроведување на планираните протоколи за надзор и одговор“, објаснија изворите.

Ризикот од ширење на хантавирусот на глобалното население е „апсолутно низок“, соопшти во петокот Светската здравствена организација.

„Ова е опасен вирус, но само за лице кое е всушност заразено. Ризикот за општата популација останува исклучително низок“, изјави портпаролот на СЗО, Кристијан Линдмаер, во Женева.

Патниците мора да се истоварат помеѓу пладне во недела и понеделник, „единствениот прозорец на можности“ поради времето, изјави официјален претставник на регионалната влада на Канарските Острови.

Луѓето кои се плашат дека можеби го заразиле вирусот или за кои е потврдено дека го имаат, се лекуваат или се замолуваат да се самоизолираат во неколку земји, вклучувајќи ги Обединетото Кралство, Франција, Германија, Холандија, Швајцарија и Јужна Африка.