Британците им дадоа зелено светло на САД за напади од нивните бази во Ормутскиот теснец

Обединетото Кралство одобри користење на своите воени бази од страна на САД за напад врз ирански цели поврзани со напади врз бродови во Ормускиот теснец.

Како што објавија британските претставници, одлуката е донесена на состанок на кабинетот и се однесува на продолжување на претходното овластување според кое американските сили би можеле да ги користат британските бази за одбрана од ирански напади.

Кабинетот на британскиот премиер Кир Стармер наведува дека базите сега ќе можат да се користат за „одбранбени операции на САД“ насочени кон „способностите што се користат за напад врз бродови во Ормускиот теснец“. Тие нагласуваат дека Велика Британија нема директно да учествува во нападите и дека „фундаменталните принципи на пристапот кон конфликтот не се менуваат“, со акцент на потребата од итна деескалација.

Војната меѓу Иран и Израел и САД трае веќе три недели, откако Израел започна напади врз ирански воени и нуклеарни цели, со поддршка на САД. Иран возврати со ракетни напади врз израелски цели и американски интереси во регионот, а конфликтот се прошири и на поморските патишта.

Ормускиот теснец, низ кој минува голем дел од светските резерви на нафта, стана една од клучните точки на кризата. Нападите врз бродовите и заканите за затворање на преминот веќе сериозно го нарушија сообраќајот и драматично ги зголемија цените на енергијата.