Унгарската Национална канцеларија за повраток и заштита на имот (NVVH) објави ново видео на кое се гледа огромна количина запленети готовински средства, откриени за време на истрагата против Миклош Сештак, поранешен министер во владата на Виктор Орбан и член на партијата Фидес.
„По завршувањето на операцијата, не само што беа направени фотографии, туку беше изработено и кратко видео на кое се прикажуваат средствата сместени во трезор: 5.071.632.000 форинти, 2.658.350 евра и 1.257.100 американски долари“, соопштија од агенцијата.
Еден месец и половина откако Сештак беше лишен од слобода, NVVH спроведе координирани истражни дејствија на 12 и 13 ноември 2026 година, во Будимпешта, како и во окрузите Пешт, Бекеш и Ноград.
За време на претресите, истражителите открија вкупно околу 6 до 6,5 милијарди форинти во различни валути. Готовината била закопана во шуми, скриена во земјоделски и складишни објекти, како и во станбени простори, а дел бил чуван и во високобезбедносен сеф лоциран на оддалечена локација.
Меѓу запленетите милиони, истражителите пронашле и банкноти од 500 евра – апоен што станува сè поредок. Поради честата употреба во перење пари и организиран криминал, оваа конкретна банкнота своевремено го добила прекарот „Бин Ладен“. Европската централна банка престана да ја издава во 2019 година, токму поради загриженоста дека таа овозможува криминални активности; имено, еден милион евра во вакви банкноти тежат само 2,2 килограми и собираат во мала торба за лаптоп. Сепак, банкнотите од 500 евра не ја изгубиле својата вредност; тие остануваат законско средство за плаќање и можат да се заменат во централните банки на еврозоната без временско ограничување.
Како истражителите ги открија местата каде што биле сокриени парите?
Сè уште не е официјално познато како властите дознале каде се скриени парите. Адвокатот Ботонд Филеп, познат и како „селски обвинител“, на социјалните мрежи изнесе претпоставка дека некој од осомничените можеби склучил спогодба за признавање вина и ги открил локациите, напоменувајќи дека таков договор не мора нужно да се однесува само на информации за парите.
„Ако апсењето претходниот ден било резултат на договор со Шештак или некој друг осомничен – односно спогодба за признавање вина – не е сигурно дека единствената обврска на осомничениот била да ги открие местата каде што биле сокриени парите“, напиша Филеп, додавајќи дека постои и можност некој што, од која било причина, знаел каде се наоѓаат парите, да дал исказ.
Во меѓувреме, адвокатот на Шештак, Габор Пап, за унгарскиот информативен портал „Телекс“ (Telex) изјави дека никој не тврдел оти пронајдените пари му припаѓаат на неговиот клиент. Тој посочи дека во случајот има повеќе осомничени и дека запленетите пари не му припаѓаат на Шештак, одбивајќи да даде повеќе детали со образложение дека станува збор за доверливи информации помеѓу адвокатот и клиентот.
Политички реакции во Унгарија
Партијата Фидес исто така ја коментираше заплента, наведувајќи во кратко соопштение дека се надеваат оти снимките немаат никаква врска со поранешниот министер, притоа додавајќи дека коалицијата Фидес-КДНП „не може да се поврзува со никого што не се придржува до својата заклетва“. Петер Маѓар во неколку наврати ја коментираше оваа акција, оценувајќи дека таа уште еднаш покажала како „Орбан се преобразува од политичар во мафијашки бос“.
„Додека секојдневно се појавуваат сè повеќе докази за тоа како мафијата на Орбан ја ограбила нашата земја, партијата Тиса веќе исполни многу од своите клучни ветувања за само шест месеци. Одиме напред. Чекор по чекор“, изјави Маѓар.
Here is the footage released by the National Asset Recovery and Protection Office showing billions of forints’ worth of cash being dug out of the ground. The money belonged to @PM_ViktorOrban’s former minister, Miklós Seszták.
When the money was handed over, 12 employees of the Hungarian State Treasury spent eight hours counting it using five cash-counting machines.
From today, Viktor Orbán is proven to be a mafia boss. An ousted mafia boss. And Fidesz is a criminal organisation.
— Magyar Péter (Ne féljetek) (@magyarpeterMP) November 13, 2026
