Бетовен во трка со птици – кој ќе се најде на новите евробанкноти?

Претседателката на Европската централна банка, Кристин Лагард, ги покани Европејците да учествуваат во изборот на новиот изглед на еврото, кој се менува прв пат откако е воведено тоа во 2002 година. Гласањето ќе биде отворено до 21 септември, преку анкета на веб-страницата на ЕЦБ, додека конечната одлука на Управниот совет на Банката се очекува на крајот од годината.

Разгледани се повеќе од 1.200 предлози, при што се издвоени две главни теми, кои го одразуваат идентитетот на континентот: европската култура и богатството на природата. Избрани се 10 конечни предлози на дизајн за кои граѓаните имаат можност да се изјаснат. Првиот сет потенцијални банкноти ги прикажува американско-грчката оперска пејачка Марија Калас, германскиот композитор Бетовен, француско-полската научничка Марија Кири-Склодовска, шпанскиот писател Мигел де Сервантес Сааведра, италијанскиот сликар Леонардо да Винчи и австриската пацифистка Берта фон Шутнер. На задната страна на банкнотите се прикажани генерички европски културни простори, вклучувајќи библиотеки, универзитети и јавни плоштади. ЕЦБ соопшти дека се претставуваат „култни европски личности што придонеле за градење на европското културно наследство“, чии достигнувања „одекнале низ целиот свет“.

Наспроти тоа, љубителите на дивиот свет може да се одлучат за опцијата со реки и птици, за која ЕЦБ вели дека „ги истакнува отпорноста и разновидноста на природните екосистеми во Европа“ за да ја покаже „важноста на природата и на заштитата на животната средина“. Овие дизајни на банкноти содржат комбинации како планински извор со ползавец, водопад со рибар, ограничена речна долина со пчеларки, река со бел штрк, речна утека и морски пејзаж. На задната страна се прикажани згради на институции на ЕУ како што се Европскиот парламент и Европската комисија.

– Евробанкнотите се повеќе од средство за плаќање – тие се еден од најопипливите изрази на Европа – рече Лагард.

Евробанкнотите со нов лик нема веднаш да ги заменат сегашните, кои ќе ја задржат својата вредност и ќе продолжат да циркулираат паралелно со новата серија. Покрај новиот визуелен идентитет, новата генерација евра ќе добие подобрени безбедносни елементи за поефикасна заштита од фалсификување, како и подобрени решенија што ќе им го олеснат користењето на лицата со оштетен вид.

Првите банкноти со новиот дизајн треба да влезат во оптек во наредните години, а нивниот развој се одвива паралелно со проектот за дигитално евро, со кој ЕЦБ сака да го надополни, а не да го замени, плаќањето во готово во иднина.