Белградските обвинители барат максимални казни за родителите на Кецмановиќ

Белградските обвинители објавија дека побарале од Апелациониот суд да ја промени првостепената пресуда и да ги осуди на максимална казна родителите на момчето што уби десет лица во 2023 година, пукајќи во училиште во Србија.

Во 2024 година, Судот го осуди таткото, Владимир Кецмановиќ, на 14 и пол години, а мајката, Милјана Кецмановиќ, на две години и единаесет месеци затвор. Инструкторот на стрелиштето, каде што таткото го учел својот син да пука, беше осуден на една година и три месеци затвор за лажно сведочење. Во жалбата, обвинителите наведоа дека не се правилно одмерени казните и дека нема да биде целосно постигната целта на казната. Тие побараа максимални казни предвидени со закон: 14 години и 11 месеци затвор за таткото и три години за мајката.

На 3 мај 2023 година, во злосторство невидено во поновата историја на Србија, нивниот син, Коста К., уби осум девојчиња, едно момче и училиштен чувар со пиштолот на својот татко, во текот на првиот час од наставата, а рани уште петмина ученици и еден наставник. Во времето на масакрот, тој имаше помалку од 14 години и не можеше да биде кривично одговорен според законот. По апсењето, тој е сместен во специјална психијатриска установа, каде што сè уште е под надзор.