Белгискиот премиер: Европа мора да преговара со Путин – сите се согласуваат, никој не се осмелува да го каже тоа

Белгискиот премиер Барт де Вевер вчера рече дека Европа мора да преговара со Русија за да се стави крај на војната во Украина и да се врати пристапот до евтина енергија, и посочи дека европските лидери се согласуваат со него, но не се осмелуваат јавно да го кажат тоа.

„Во приватни разговори, европските лидери се согласуваат со мене, но никој не се осмелува да го каже тоа гласно. Мора да го завршиме конфликтот во интерес на Европа, без да бидеме наивни кон Владимир Путин“, рече Де Вевер во интервју за „Белгиски ехо“, пренесува „Еуроњуз“.

Тој додаде дека Европа не смее да ги повтори грешките од минатото во односите со Русија, нагласувајќи ја потребата од вооружување и распоредување војници на своите источни граници.

„Во исто време, мора да ги нормализираме односите со Русија и да го вратиме пристапот до евтина енергија. Тоа е она што го диктира здравиот разум“, рече Де Вевер.

Според него, двојната стратегија на Европа, која вклучува воена поддршка за Украина и притисок врз руската економија, стана неодржлива без целосна поддршка од Соединетите Американски Држави.

„Со оглед на тоа што не сме во можност да извршиме притисок врз Путин со испраќање оружје во Украина и дека не можеме да ја задушиме неговата економија без поддршка од САД, ни останува само една опција – да склучиме договор“, рече тој.

Макрон, Мелони и Орбан сакаат директни разговори со Русија

Прашањето останува контроверзно во рамките на Европската Унија. Додека францускиот претседател Емануел Макрон, италијанската премиерка Џорџија Мелони и унгарскиот премиер Виктор Орбан повикаа на директни разговори со Москва, Полска и трите балтички држави се остро против.

Неколку европски лидери оваа недела ја критикуваа одлуката на американскиот претседател Доналд Трамп да ги укине санкциите за руската нафта во танкери во обид да го запре наглиот пораст на цените на нафтата. Германскиот канцелар Фридрих Мерц и претседателот на Европскиот совет, Антонио Коста, ја осудија одлуката, велејќи дека таа може да има негативно влијание врз европската безбедност.