Арина Сабаленка е елиминирана, Рибакина има златна шанса

Арина Сабаленка доживеа ново големо разочарување и предвреме го заврши настапот на турнирот во Синсинати, откако во осминафиналето загуби од 35. тенисерка на ВТА-листата, Сара Бејлек. Чешката тенисерка славеше со 7:6, 6:4 и го оствари најголемиот триумф во својата кариера, додека за Сабаленка овој пораз е уште еден доказ дека се наоѓа во сериозна резултатска криза. Белорусинката имаше големи предности во двата сета, но не успеа да ги искористи. Во првиот сет водеше со 5:1 во тајбрејкот, но потоа загуби пет поени по ред, додека во вториот сет имаше предност од 4:1, а потоа дозволи противничката да освои пет гема по ред и да стигне до сензационална победа.

Проблемите за Сабаленка траат веќе неколку месеци и не се ограничуваат само на еден турнир. Белорусинката ја започна сезоната фантастично со титулата во Бризбејн, финале на Австралија опен и трофејот во Индијан Велс и Мајами, но од крајот на март, не успеа да стигне до ниту едно финале. Во Мадрид загуби од Хејли Баптист, во Рим беше поразена од Сорана Кирстеа, додека на Ролан Гарос загуби од Дијана Шнајдер. Следуваше пораз од Џесика Пегула во Берлин, а на Вимблдон, подобра од неа беше Наоми Осака. Во Торонто, пак, беше елиминирана од Екатерина Александрова, пред новиот неуспех во Синсинати.

Ситуацијата на врвот дополнително ја прави интересна Елена Рибакина, која сега има реална можност да ја загрози позицијата на Сабаленка. Казахстанката може да стигне до првото место на ВТА-листата уште во Синсинати доколку се пласира во финалето. На патот дотаму ја очекува Ига Швјонтек, а доколку ја мине таа пречка, ќе игра против подобрата од дуелот меѓу Аманда Анисимова и Џесика Пегула. Доколку не успее во Синсинати, Рибакина ќе има уште поголема шанса на САД опен.

Сабаленка во Њујорк ја брани титулата и дури 2.000 ВТА-поени, додека Рибакина брани само 240. Тоа значи дека разликата на врвот може значително да се намали, а можеби и целосно да исчезне по последниот гренд слем во сезоната. Белорусинката мора брзо да ја пронајде формата доколку сака да остане на врвот, бидејќи Рибакина веќе чека и има отворен пат кон најголемиот успех во кариерата.