Арагчи: Подготвени сме за копнена инвазија на САД

Иранскиот министер за надворешни работи, Абас Арагчи, во четврток изјави дека неговата земја е подготвена за копнена инвазија на американските трупи во услови на војна предизвикана од САД и Израел, која брзо се шири низ регионот. Во ексклузивно интервју, Арагчи ги отфрли сите преговори со САД и рече дека Иран не барал прекин на огнот, објави „Ен-би-си њуз“.

Арагчи разговараше со водителот на NBC Nightly News, Том Ламас, преку видео врска од Техеран, додека американските и израелските воздушни напади врз земјата продолжуваа. Неговите коментари дојдоа откако американските и израелските војски започнаа целосен напад врз Иран во саботата, уништувајќи ги одбранбените сили на земјата и убивајќи го врховниот лидер ајатолах Али Хамнеи.

„Ги чекаме“

Кога беше прашан дали се плаши од можна копнена инвазија на САД, Арагчи одговори со пркосен тон. „Не, ги чекаме“, рече тој, додавајќи: „Уверени сме дека можеме да им се спротивставиме, а за нив тоа би била голема катастрофа“. Арагчи, исто така, изјави дека Иран не барал прекин на огнот и покрај американските и израелските напади низ целата земја.

„Не побаравме примирје, дури ни минатиот пат. Потоа Израел побара примирје. Тие побараа безусловно примирје по 12 дена наш отпор кон нивната агресија“, рече тој, осврнувајќи се на 12-дневната војна минатиот јуни, кога израелската и американската војска ги нападнаа нуклеарните постројки на Иран.

Напад врз училиштето

Ламас го праша министерот за нападот врз основно училиште во Минаб, во кој беа убиени десетици ученички, за кој американската војска рече дека е под истрага. Водителот праша дали е можно да станува збор за залутана иранска воена муниција.

Арагчи одговори дека 171 ученичка биле убиени во нападот и дека американските и израелските сили се одговорни за тоа. „Тоа е она што го вели нашата војска. Значи, или САД или Израел. Која е разликата?“

Падот на преговорите

Минатиот четврток, Арагчи беше во Женева, каде што преговараше за можен договор со претставникот на претседателот Доналд Трамп, Стив Виткоф, и неговиот зет, Џаред Кушнер. Нападот во средината на разговорите уништи секаква подготвеност од страна на Иран за одржување идни разговори, рече Арагчи, додавајќи дека не комуницирал ниту со Виткоф ниту со Кушнер од минатата недела.

„Факт е дека немаме позитивно искуство во преговорите со Соединетите Држави, особено со оваа администрација. Преговаравме двапати, минатата година и оваа година, а потоа тие нè нападнаа во средината на преговорите“, рече Арагчи. Тој додаде: „Затоа, не гледаме причина повторно да разговараме со оние кои не се искрени во преговорите и немаат добри намери“.

„Нема победници во оваа војна“

Арагчи понуди мрачна прогноза за исходот од сегашниот конфликт. „Нема победници во оваа војна“, рече тој. „Нашата победа е во успехот во спротивставувањето на нивните нелегални цели, и тоа е она што го направивме досега“, пренесе „Индекс“.