Анализа на експерт: Кој ќе има корист од затворањето на Ормутскиот теснец и до каде ќе оди порастот на цените на нафтата

Русија ќе има најголема корист од затворањето на Ормутскиот теснец кога станува збор за Европа и Азија, изјави мeѓународниот експерт за енергетика, Душан Васиљевиќ, и додаде дека Русија сега ќе се наметне како единствена можна алтернатива со оглед на тоа што сега нема да има нафта и гас од Блискиот Исток.

– Ова веќе се случи со оглед на тоа што Американците дадоа согласност Индија повторно да почне да увезува руска нафта затоа што на Индија ѝ е потребна, а нема каде да ја набави. Нешто слично веројатно ќе се случи и со Европа ако оваа војна потрае, каде што дел од овие извори на енергија ќе мора да се заменат од Русија – процени тој за Танјуг.

Васиљевиќ истакна дека затворањето на Ормутскиот теснец носи големи долгорочни последици затоа што околу 20 проценти од светската нафта поминува низ него и додаде дека затворањето на овој теснец создава проблем во однос на цените и понудата, но и за производителите и купувачите.

– Од друга страна, самиот Иран има проблем со ова бидејќи неговите пристаништа за испорака на нафта се во Персискиот Залив, а не може да ја испорача ниту својата нафта, првенствено на Кина, која е најголем потрошувач, а потоа и на други корисници – истакна тој.

На прашањето дали порастот на цените на нафтата и гасот ќе престане, или ќе продолжи да оди нагоре поради конфликтот меѓу Иран и САД, Васиљевиќ оцени дека иако цените сигурно ќе растат бидејќи сè уште не е јасно дека кризата на Блискиот Исток наскоро ќе се реши, но овие цени не можат да растат бесконечно бидејќи некој мора да плати за тоа.

Тој додаде дека ако овие цени го надминат прагот на прифатливост, тогаш побарувачката ќе престане, што ќе предизвика пад на цената бидејќи така е регулиран пазарот.

– Многу повеќе ме загрижува дали овој конфликт ќе престане бидејќи носи со себе многу други штети освен енергијата. Овој конфликт создава криза во сите други области што порано или подоцна ќе се почувствува во сите земји во светот – рече тој.

Одговарајќи на прашањето дали Европа сега се соочува со нова гасна криза со оглед на тоа што Катар го суспендираше производството на течен природен гас (LNG) и дека цената на гасот во Европа скокна за 45 проценти, Васиљевиќ рече дека Европа се соочува со нова гасна криза поради американско-рускиот гас, кој не ги задоволува сите потреби и е значително поскап од рускиот гас, и заклучи дека Европа ќе мора да се сврти кон друга алтернатива, најверојатно кон Русија.