Американските разузнавачи предупредуваат дека Нетанјаху би можел да го поткопа договорот со Иран

Американските разузнавачки агенции ја предупредија администрацијата на претседателот Доналд Трамп дека израелскиот премиер Бенјамин Нетанјаху веројатно ќе преземе чекори во Либан што би ги поткопале неговите напори за постигнување траен мировен договор со Иран, изјавија денес сегашни и поранешни американски функционери.

Нов извештај на американското разузнавање заклучува дека политичкиот опстанок на Нетанјаху пред парламентарните избори на есен е поврзан со покажување на гласачите дека нема да ги повлече трупите од Либан и дека има намера да ги ескалира борбите со либанското милитантно движење Хезболах, поддржано од Иран, изјави за „Вашингтон пост“ американски функционер запознаен со извештајот.

Во извештајот на американското разузнавање, исто така, се наведува дека Израел е фрустриран од условите на мировниот меморандум на Трамп со Иран, кои ја саботираат целта на Израел за одржување максимален притисок врз Техеран, според сегашни и поранешни функционери, кои зборуваа под услов на анонимност, пренесува Танјуг.