Најдобриот шпански тенисер, Карлос Алкараз, е принуден да паузира поради проблем со зглобот, што значи дека нема да го видиме на овогодинешниот Ролан Гарос.
По повлекувањето од турнирите во Барселона и Мадрид, стана јасно дека ситуацијата не е безопасна, а Шпанецот пред неколку дена потврди на социјалните мрежи дека нема да ја брани титулата во Париз.
Сега се огласи и неговиот тренер за кондиција Алберто Љедо Килес. Тој рече дека тимот се соочува со предизвикувачки период, но и можност за напредок.
„Тешките моменти се исто така дел од патувањето. Кога ќе се појави пречка на вашиот пат, имате две опции: да дозволите да ве собори или да ја искористите за да станете подобри. Ние ја избравме втората опција. Овој период ќе ни овозможи да работиме на она што останува незабележано кога се натпреваруваме. Ќе се вратиме помотивирани и посилни од кога било“, истакна Љедо Килес.
Засега не е точно познато колку долго ќе трае паузата на еден од најдобрите тенисери во светот, што дополнително ги загрижува неговите фанови, особено имајќи го предвид одличниот почеток на сезоната.
Алкараз има импресивен скор од 22-3 оваа година, со две освоени титули – на Отвореното првенство на Австралија и на турнирот во Доха.
Ролан Гарос е на програмата од 24 мај до 7 јуни, и останува да се види дали Шпанецот ќе може да се опорави до почетокот на сезоната на трева или паузата ќе трае подолго.
