Ако утрешните резултати од последните анализи покажат дека количината на хлор во водата е во дозволените граници, водата во Гостивар конечно би можела повторно да биде пуштена за пиење, по речиси еден месец од почетокот на водната криза.
„Од последните неколку мерења се покажа дека нема бактерии во водата, доминира хлорот. По наредба на лабораториите кои прават контроли на 12 часа, ЈП „Комуналец“ ја намали количината на хлорот кој се користеше за дезинфекција. Последните мерења ни покажаа дека количината на резидуален хлор во водата е на границите на дозволеното и се чекаат последните мерења кои се направени вчера. Резултати се очекуваат утре попладне. Во случај да се покаже дека количината на хлорот е добра како претходните две анализи, тогаш од Централниот штаб мислам дека ќе соопштат на јавноста дека водата можеби ќе биде пуштена во употреба и за пиење“, изјави за весникот Вечер , Зуди Џелили од Кризниот штаб во Гостивар.
Во контролата се ангажирани три лаборатории, кои земаат примероци од седум исти локации.
„Се договорија сите три да земаат од истите места за да биде споредбата квалитетна и резултатите посигурни. Резултатите се поклопуваат и се согласни со состојбата на водата во тие моменти“, вели Џелили за ВЕЧЕР. (П.А.)
