Сериозен проблем: Вештачката интелигенција би можела да го забави развојот на мозокот кај децата

Сè поголемата употреба на генеративна вештачка интелигенција меѓу децата би можела негативно да влијае врз развојот на критичкото размислување и другите когнитивни способности, предупредуваат истражувачите, додека двата најголеми училишни окрузи во Соединетите Американски Држави го ограничуваат пристапот до овие алатки на училишните уреди.

Обединетиот училишен округ на Лос Анџелес најави дека во текот на учебната 2026/2027 година ќе им забрани на учениците користење генеративна вештачка интелигенција на училишните уреди, откако слични ограничувања воведе и системот на јавни училишта во Њујорк.

Иако бројот на истражувања за влијанието на генеративната вештачка интелигенција врз развојот на децата е сè уште релативно мал, досегашните резултати укажуваат дека учениците често ја користат ВИ како кратенка до одговорите, наместо да минуваат низ процесите на размислување и решавање проблеми кои се важни за учењето.

Ребека Винтроп од институцијата „Брукингс“ за овој феномен го употреби изразот „когнитивно заостанување“, предупредувајќи дека децата кои редовно користат ВИ за извршување на училишните и другите мисловни задачи можат да го прескокнат токму процесот преку кој се развиваат тие вештини.

Во едно истражување на научниците од израелскиот институт „Технион“ учествувале 15 деца на возраст од шест и седум години и 16 возрасни. Додека го користеле ChatGPT во креативна задача, снимањето на мозокот кај децата покажало помала усогласеност на активноста во регионите поврзани со вниманието и обработката на информации отколку кај возрасните.

Авторите предупредија дека станува збор за мало истражување кое сè уште не поминало целосна стручна рецензија, но наведоа дека резултатите го отвораат прашањето дали шест години е премногу рано за користење генеративна вештачка интелигенција, пренесува dpa.

Друго истражување, спроведено меѓу средношколци во Турција и објавено во научното списание PNAS, покажа дека учениците кои во текот на вежбањето можеле да користат генеративна вештачка интелигенција биле значително поуспешни во решавањето на задачите.

Сепак, кога потоа полагале тест без пристап до ВИ, учениците кои користеле платформа способна директно да им дава одговори оствариле резултат за 17 проценти послаб од учениците кои во текот на подготовката не користеле вештачка интелигенција.

Коавторот на истражувањето, Алп Сунгу од школата „Вартон“, изјави дека учениците во пракса често ја користеле ВИ како „машина за одговори“.

Истражувачите сепак предупредуваат дека целосните забрани можеби нема да бидат доволни, бидејќи учениците можат да ја користат генеративната вештачка интелигенција на приватните уреди надвор од училиштето.