Ел Нињо „собира сила“: Светот го очекуваат горештини, суши, пожари и разорни поплави

Ел Нињо продолжува да се зајакнува и би можел да прерасне во еден од најсилните вакви феномени некогаш забележани, додека метеоролозите предупредуваат дека последиците би можеле да се почувствуваат низ целиот свет длабоко во текот на 2027 година. Станува збор за екстремна топлина, суши, пожари и разорни поплави, а следната година би можела да стане најжешката досега. Светската метеоролошка организација (WMO) предупреди дека Ел Нињо сега е цврсто воспоставен и ќе се зајакне дополнително во наредните месеци. Според најновите прогнози на WMO, постои речиси 100 проценти веројатност дека Ел Нињо ќе трае барем до февруари 2027 година, додека неговиот врв се очекува на крајот на оваа година.

Исклучително топлите води на тропскиот Пацифик дополнително го поттикнуваат овој климатски феномен, кој може силно да ја промени распределбата на врнежите и температурите низ целата планета и да го зголеми ризикот од поплави, суши и екстремна топлина.

Дали доаѓа најсилниот Ел Нињо во последните 1.000 години?

„Гардијан“ објавува дека анализите на коралите, прстените на дрвјата и историските документи укажуваат дека сегашниот Ел Нињо би можел да достигне интензитет невиден барем еден милениум.

Доколку ваквите прогнози се остварат, феноменот би можел дополнително да „акумулира“ топлина во атмосферата која веќе се затоплува поради климатските промени.

Токму поради комбинацијата од силен Ел Нињо и долгорочно глобално затоплување, експертите предупредуваат дека 2027 година би можела да стане најжешката година досега регистрирана.

Првите ефекти од засилувањето на Ел Нињо веќе се регистрираат во различни делови од светот.

Во Индонезија, ризикот од шумски пожари се зголемува, додека во Индија е забележано слабеење на вкупните монсунски врнежи, но во исто време и појава на интензивни локални дождови и ненадејни поплави.

Метеоролозите предупредуваат дека последиците би можеле да станат уште поизразени во наредните месеци.

Што е Ел Нињо?

Ел Нињо е природен климатски феномен кој се карактеризира со необично затоплување на површинските води на централниот и источниот тропски Пацифик. Се јавува во неправилни интервали од приближно две до седум години и може да трае со месеци.

Иако се случува на илјадници километри од Европа, промените во температурите на океаните влијаат на атмосферската циркулација низ целиот свет, поради што Ел Нињо може да ја промени количината на врнежи, температурата и фреквенцијата на екстремните временски настани на неколку континенти.

Овој пат, метеоролозите се особено загрижени за фактот дека се развива исклучително силен Ел Нињо во свет кој е веќе значително потопол отколку во претходните големи циклуси.

Затоа, 2027 година би можела да донесе нова серија температурни рекорди и екстремни временски настани низ планетата.