Во македонскиот КИЦ во Белград, вечерва, први октомври, во 19:30 часотдиректорот Васко Шутаров и д-р Ана Франговска, ќе ја отворат изложбата „Саботна ноќна треска“ на авторите Марија Ветероска, Игор Сековски и Иван Блажев.
Изложбата премиерно беше поставена во Скопје во 2024 година, а сега во поставка адаптирана на изложбениот простор во КИЦ Белград можност да ја видат ќе има и белградската публика. Трите автори изложуваат дела на една заедничка тема, но низ три различни изразни форми. Сековски и Ветероска изложуваат дела составени од комбинација на видео и просторна инсталација, додека Блажев изложува серија на фотографии.

Куратор на изложбата е д-р Ана Франговска која во пропратниот текст кон изложбата пишува: „Саботна ноќна треска“ е евокативен наслов кој веднаш создава слики од општествениот живот, славењето и енергичната урбана култура. Сепак, во контекст на овој проект, насловот станува длабоко ироничен, не одразувајќи го раздвижениот ноќен живот некогаш поврзан со Скопје, туку повеќе е критика на современото разочарување од градот.

Уметниците – Игор Сековски, Иван Блажев и Марија Ветероска – ја користат својата работа за да ги истражат социјалната, психолошката и урбаната фрагментација што сега го дефинира животот во Скопје. Нивните колективни напори создаваат дијалог кој ја надминува обичната носталгија, навлегувајќи во филозофските и во егзистенцијалните импликации на живеењето во град кој изгубил голем дел од своето сврзно ткиво.

Изложбата „Саботна ноќна треска“ не претставува само носталгичен копнеж за минатото, туку длабоко се занимава со критичката урбана теорија, егзистенцијалната филозофија и постмодерната критика на современиот живот.

Изложбата се реализира со финансиска поддршка од Министерството за култура и туризам во рамки на годишната програма за проекти од областа на меѓународната соработка и ќе биде поставена во КИЦ Белград до 1 ноември.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ