Цените на нафтата паднаа, обновувањето на извозот од Заливот ги ублажи стравувањата од недостиг

Цените на нафтата во четвртокот паднаа за околу еден процент, бидејќи закрепнувањето на извозот на сурова нафта од Персискиот Залив и неочекуваниот раст на залихите во САД ги ублажија загриженостите за снабдувањето, додека инвеститорите ги следеа обновените дипломатски контакти меѓу САД и Иран.

Фјучерсите на нафтата од типот „Брент“ паднаа за 1,1 отсто, на 96,92 долари за барел, додека американската нафта „Вест Тексас Интермидиет“ (WTI) поевтини за 1,4 отсто, на 89,18 долари за барел, пренесува Ројтерс.

Двата референтни типа на нафта во средата забележаа раст од околу еден долар по барел. „Брент“ во септември оствари раст од приближно 14 отсто – што претставува најголем месечен пораст од јули – додека WTI зајакна за околу пет отсто.

Постепената нормализација на извозот од регионот на Заливот придонесе за притисокот врз цените во насока на нивно намалување. Саудиска Арабија го продолжи товарењето нафта на танкери во пристаништето Јанбу, откако претходно повторно ги активираше операциите на нафтоводот „Исток-Запад“.

Истовремено, залихите на сурова нафта во САД се зголемија за 922.000 барели, достигнувајќи 427,3 милиони барели во неделата што заврши на 25 септември, според податоците на американската Управа за енергетски информации.

Пазарите исто така ги следат новите дипломатски контакти меѓу Вашингтон и Техеран. Иран во средата објави дека добил одговор од САД на својот најнов предлог за оживување на заглавениот нуклеарен договор.