Зеленски оди во Париз на отворањето на Нотр Дам: „Ќе има прилика да го ‘почувствува пулсот’ за можна средба со Трамп“, вели извор

Украинскиот претседател Володимир Зеленски ќе отпатува во Париз за да присуствува на отворањето на катедралата Нотр Дам, а тоа патување би можело да го искористи за разговори со новоизбраниот американски претседател Доналд Трамп бидејќи имало обиди да се договори средба, изјавија два дипломатски извори, пренесува Курир.рс.

Договорот веројатно нема да биде склучен до последен момент и сите разговори ќе бидат дискретни, додаваат тие. Украинска делегација се состана со високи соработници на Трамп во средата, рекоа два извори запознаени со состанокот, додека Украина бара поддршка од новата американска администрација против руската инвазија.

Францускиот претседател Емануел Макрон доцна попладне во претседателската палата ќе се сретне со Трамп, а веднаш потоа ќе се сретне и со Зеленски, соопшти француското претседателство.

Не беше наведено дали Зеленски и Трамп ќе се сретнат во тој момент, иако еден извор рече дека е можна трилатерална средба. Секоја средба во Париз би била можност за украинскиот претседател да побара поддршка и да ги оцени ставовите на Трамп.

Со оглед на тоа што Франција е во политичка криза по падот на нејзината влада во четвртокот, Макрон се надева дека ќе блесне на меѓународната сцена со зближување на двајцата лидери и покажување дека Париз има клучна улога во поддршката на Украина и во какви било идни преговори, велат дипломатите, пренесува Курир.рс.