Затемнувањето на сонцето ги зголеми цените за сместување во Европа – во некои дестинации и над 1.000 евра по ноќ

Тоталното затемнување на сонцето предизвика огромно зголемување на побарувачката за сместување во делови од Европа низ кои минуваше патеката на целосното затемнување.

Цените на хотелите и приватното сместување во некои дестинации надминаа 1.000 евра по ноќ.

Затемнувањето, кое беше видливо во Обединетото Кралство, Исланд, северна Шпанија, Гренланд и Португалија на 12 август, охрабри голем број туристи да патуваат во области од кои најдобро може да се набљудува овој небесен феномен.

Во Рејкјавик, хотелите чинат во просек околу 864 евра по ноќ оваа недела, што е двојно повеќе отколку во истиот период во 2025 година, објавува „Си-ен-би-си“.

Просечната цена на приватното сместување достигна околу 1.001 евро, што е за 178 проценти повеќе од претходната година.

Во Билбао, просечната цена на приватно сместување беше околу 929 евра по ноќ, што е за 206 проценти повеќе од истиот период минатата година.

Хотелските соби чинат во просек 269 евра, што е зголемување од 35 проценти во однос на претходната година.

Просечните цени за краткорочен изнајмување беа значително повисоки од цените на хотелите во некои градови, иако податоците не опфаќаат идентични видови сместување.

Најевтината дестинација меѓу анкетираните градови беше Сантијаго де Компостела, кој е веднаш надвор од зоната на тоталитет.

Просечната цена на хотелска соба таму беше 165 евра по ноќ, што е сепак 13 проценти повеќе од претходната година.

„Тестирањето колку пазарот може да издржи во однос на цените е вообичаена практика за хотелиерите кога станува збор за настани што привлекуваат огромна побарувачка, како што се Светското првенство или концертите на Тејлор Свифт“, рече Џонатан Гоу, претставник на Лајтхаус.

Тој проценува дека затемнувањето донесе „силен, но концентриран“ поттик за туризмот, ограничен главно на неколку дена околу самиот настан, додавајќи дека тоа нема значително да влијае на трендовите во туристичката индустрија.