Кога Картер Стивенс им кажува на луѓето дека заработува шестцифрена сума годишно пребарувајќи по контејнери, многумина претпоставуваат дека претерува. Сепак, овој 31-годишник од Нешвил, Тенеси, има конкретни бројки што покажуваат дека неговата необична дејност може да биде исклучително профитабилна.
Според документацијата што ја разгледаа од „CNBC Make It“, Стивенс остварил вкупна продажба од приближно 140.000 долари (околу 125.000 евра) во периодот помеѓу септември 2025 и септември 2026 година. Неговиот деловен модел е едноставен: тој посетува контејнери, зема предмети што другите ги фрлиле, ги чисти и реновира, а потоа ги продава преку платформи како eBay и Facebook Marketplace.
Тој главно пребарува во области околу деловни комплекси и луксузни станбени згради. Откако го започнал овој потфат во март 2024 година, пронашол и продал бројни вредни предмети, вклучувајќи рачно изработени персиски теписи, скапи канцелариски столици, па дури и самурајски мечеви.
Покрај тоа што му носат заработка, овие отфрлени предмети му помагаат и да ги одржува деловните трошоци на ниско ниво. Често наоѓа картонски кутии и селотејп за пакување, што значи дека во околу 90 отсто од случаите, не мора да купува амбалажа за испраќање на своите нарачки.
„Количината на отпад што може да се најде во оваа земја е неверојатна. Фрламе толку многу работи“, вели Стивенс.
Понекогаш, Стивенс бара дозвола од управата на зградите за да го пребара нивниот отпад, претставувајќи се како лице што нуди услуги за отстранување на непотребни предмети. Сепак, неговата работа не е секогаш лесна. Понекогаш тој се наоѓа речиси до половината закопан во ѓубре, пребарувајќи низ отпадоци и расипана храна во потрага по нешто вредно.
Тој е особено заинтересиран за деловни објекти каде што компаниите го намалуваат обемот на работа или се селат, бидејќи тие често фрлаат големи количества канцелариска опрема. Ги претпочита контејнерите што се релативно чисти, без остатоци од храна или органски отпад.
Сепак, тој внимава да не навлезе на приватен имот. Ако сопственикот на имотот или чуварот побара од него да си замине, тој избира да ги остави пронајдените предмети зад себе, наместо да влегува во конфликт.
Од зависност и долгови до водење сопствен бизнис
Животната приказна на Стивенс не секогаш била приказна за успех. Роден е во Нешвил, а неговиот татко — продуцент на кантри и госпел музика — освоил пет награди „Греми“, работејќи со познати уметници како Блејк Шелтон и Кери Андервуд. Меѓутоа, за време на студиите, Картер развил зависност од лекот „Адерал“, што довело до тоа да ги напушти студиите во 2018 година — само неколку месеци пред дипломирањето. Без диплома, тешко наоѓал постојана работа, а парите што ги заработувал често ги трошел на дрога и скапи предмети. До јуни 2023 година, веќе не можел да ја плаќа киријата. Едно време живеел во изнајмен магацински простор, а откако бил иселен и од таму, поминал три недели живеејќи во својот автомобил.
„Си ветив дека никогаш повеќе нема да дозволам да завршам во таква ситуација“, се сеќава тој за тој период.
Откако еден роднина му позајмил пари во октомври 2023 година за повторно да изнајми стан, Стивенс одлучил подобро да ги контролира своите трошоци и да најде постабилен извор на приход.
Пресвртницата се случила неколку месеци подоцна, кога во близина на една бензинска пумпа пронашол фрлен пар црни патики „Најк“. Тој ги исчисти и дезинфицираше, а потоа постави оглас на интернет. Ги продаде за 35 долари.
„За првпат во животот најдов нешто што, во суштина, беше ѓубре, го продадов и заработив пари“, вели Стивенс. Тој мал успех му покажа дека предметите што другите ги фрлаат можат да претставуваат сериозна деловна можност.
Едно од неговите најголеми откритија се случи во деловен комплекс, каде што, покрај преполн контејнер за отпад, пронајде голем број канцелариски столици од брендот „Стилкејс“. Кога се нови, тие вредат повеќе од 1.000 долари по парче.
Користејќи половен пикап и приколка што самиот ја направил, однесе вкупно 190 столици. Поголемиот дел од нив ги продаде преку неколку големи трансакции на „Фејсбук маркетплејс“ за вкупно 17.000 долари, додека дополнителни 10.600 долари заработи од поединечна продажба на преостанатите столици.
Така, ова едно откритие му донесе вкупно 27.600 долари, според документите што ги разгледа „CNBC Make It“.
Во близина на луксузни станбени згради, тој наоѓал мебел од познати брендови како „West Elm“, како и „iPad“- уреди, електронска опрема и електрични алати кои сè уште биле во исправна состојба.
„Речиси секое парче мебел во мојот стан потекнува од контејнер“, вели Стивенс.
Тој не е сигурен дали ќе може да го одржи ова ниво на заработка.
Стивенс работи сам, а за да ги намали трошоците за гориво, тој главно ги посетува локациите што се наоѓаат на само неколку километри од неговиот стан. Предметите што ги наоѓа ги чува во простор за кој плаќа 400 долари месечно, а потоа постепено ги огласува за продажба.
Сепак, тој признава дека неговата заработка варира. Голем дел од неговиот приход дошол во текот на пет особено успешни месеци, благодарение на неколку навистина вредни пронајдоци.
„Претходно оваа година имав голема среќа и заработив многу пари. Не тврдам дека ова е нешто што би можел да го правам секоја година“, вели тој.
Со оглед на непредвидливата природа на оваа работа, тој се обидува да заштеди што е можно повеќе пари. Исто така, размислува да навлезе во бизнисот со недвижнини, што го смета за потенцијално постабилен извор на приход.
Сепак, тој нема намера целосно да се откаже од пребарувањето по контејнери. Токму неизвесноста – како и можноста да се открие нешто вредно – е она што го мотивира да продолжи.
„Не можам да замислам да поминам покрај контејнер што изгледа ветувачки. Имам пронајдено толку многу интересни работи, што мислам дека секогаш ќе бидам љубопитен да видам што има внатре“, заклучува Стивенс. Неговата приказна покажува како е можно да се изгради профитабилен бизнис од предмети што другите ги сметаат за безвредни. Сепак, ниту самиот Стивенс не тврди дека ваквата заработка е загарантирана: најголемите приходи зависат од ретки и вредни пронајдоци, а останува да се види дали тој ќе може да продолжи да ги остварува со истото темпо и во годините што доаѓаат, пренесува Dnevno.hr.
