Патниците на летот на „Ер Србија“ од Сплит до Белград мораа да го напуштат авионот поради сомневање за закана со бомба, откако полицијата отстрани еден патник, пренесува Dnevnik.hr.
Инцидентот се случи со авион на „Ер Србија“ (Air Serbia) кој требаше да полета од Сплит за Белград во 15:20 часот; Винко Паиќ, еден од патниците, ја раскажа целата случка за информативниот портал.
„Седевме на пистата кога ненадејно во авионот влезе полиција – некои во униформи, други во цивилна облека. Низ прозорецот видов полициско возило до авионот. Тие изведоа еден постар господин со седа коса, кој седеше во третиот или четвртиот ред“, изјави Паиќ.
„Спомена бомба“
Никој во авионот не знаеше што се случува, па тој побара објаснување од еден од членовите на екипажот.
„Тој го спомена зборот ‘бомба’“, накратко му објасни членот на екипажот.
Паиќ исто така ни кажа дека неколку патници го напуштиле авионот од страв, а пилотот потоа преку разгласот – околу 15:40 часот – соопшти дека сите патници мора да излезат бидејќи авионот треба да се прегледа од безбедносни причини.
Полиција: „Рече дека не се шегува“
Полицијата во Сплит го потврди апсењето на 75-годишен патник. Околу 15:25 часот – пред полетувањето – тој му рекол на екипажот дека во авионот има бомба и додал дека не се шегува.
„Авионот е евакуиран и ќе биде подложен на уште еден преглед пред полетувањето; патниците и багажот исто така повторно ќе бидат проверени“, соопштија од Полициската управа на Сплит-Далмација.
