Српскиот претседател Александар Вучиќ, кој пристигна во Москва за да присуствува на 80-годишнината од победата над фашизмот, изјави дека очекува последици за неговата одлука да присуствува на Парадата на победата во Москва, но дека ќе ги почувствува тој лично, а не државата.
Вучиќ изјави дека е голема чест за Србија да се сретне со двајца од четирите најголеми светски лидери – кинескиот претседател Си Џинпинг и рускиот претседател Владимир Путин.
Тој нагласи дека Србија останува на европскиот пат, но дека е подготвен лично да ги сноси последиците од своите одлуки, апелирајќи целата земја да не биде казнета за ова.
Како што рече тој, наместо разбирање на позицијата на Србија, заканите и заплашувањата доаѓаат од одредени западни претставници. Тој рече дека не очекува рационални одговори, туку притисоци.
„Наместо да се однесуваат кон нас со разбирање и попустливост, како мал народ на кој му нанесоа голема неправда, одземајќи ни 14 проценти од територијата, денес тие имаат свои интереси и ни велат: „Не се враќајте во минатото“, рече Вучиќ.
Како што изјави тој, кога сè е така поставено, „тие не можат да дадат рационален одговор, освен закани и заплашување“.
Тој додаде дека никого не довел во заблуда со одењето во Москва и дека Србија е должна да се грижи за своите интереси.
„Неодамна наполнив 55 години. Некои би рекле дека тоа не е доволно за многу искусен политичар, но јас сум повеќе од тоа. Премногу сум искусен, доволно стар и долго време сум на оваа позиција за да знам дека не можеш ниту да дадеш ниту да продадеш чест, лик и гордост на некого“, рече Вучиќ.
Како што вели, му ветил на Путин дека ќе дојде и не излажал никого од Европската Унија за тоа.
„Го кажав тоа на Урсула фон дер Лајен, и на Марта Кос, и на Емануел Макрон, и на Џорџа Мелона – им го кажав тоа на сите. Им ја кажав вистината на сите, никого не излажав“, истакна тој.
Во врска со проблемите со пристигнувањето во Москва во однос на забраната за прелетување, тој рече:
„Пројдовме преку Бугарија, Турција и Азербејџан, а кога ни беше даден коридор, го продолживме нашето патување кон Москва. Пристигнав во Москва каде што ме пречека заменик-министерот за надворешни работи Грушко, еден од најважните луѓе во руската дипломатија“, рече Вучиќ.
Тој се осврна и на неговото неодамнешно патување во Соединетите Држави каде што требаше да се сретне со претседателот Доналд Трамп.
„Не сакам фотографија со Трамп, сакам да разговарам со него. Разговарав со него во Овалната соба, ме интересира што можам да направам за нашиот народ. Верувам дека тој прави многу добри работи за светот, уште потешко ми беше што не можевме да одиме на состанокот со Бенсент и Гренел, тој одлучува за царините. Не одам никаде за да се забавувам, туку да правам работи за Србија и нејзините граѓани, тоа е мојата борба“, нагласи Вучиќ.
