Вучиќ планира да го смени текот на Ибар за да му наштети на Косово поради притисокот врз српската заедница

Притисокот врз српската заедница на Косово и мерките на Приштина предизвикаа незадоволство во Белград, а како еден од одговорите, претседателот на Србија, Александар Вучиќ, ја спомена можноста за промена на текот на реката Ибар.

– Ќе видиме што ќе прават Албанците и како ќе се однесуваат – рече тој.

Водоводниот систем Ибар-Лепенец е од стратешко значење за снабдувањето со вода за пиење на Косово, за неговото земјоделство и за производството на енергија.

Експертите во Србија предупредуваат дека ова е епски потфат што може да трае со децении, ќе бара огромни суми пари, а пренасочувањето на природниот тек на реката низ карпестиот и планински терен на Динарските Планини ќе бара обемни земјени работи, тунели и брани, пишува „Дојче веле“. Таквата интервенција би се заканила и со еколошка катастрофа во целото сливно подрачје. Пензионираниот професор по хидротехника и хидрологија, Јован Деспотовиќ, изјави за „Фо нет“ дека изјавите на српскиот претседател, Александар Вучиќ, за промена на текот на реката Ибар „се како одење во сон и дека тоа е проект што е невозможно да се реализира за кратко време без да се урнат ридови и планини, а не е ни можно според европските прописи“.