Американски воен авион денеска се урна во близина на воздухопловната база „Спангдалем“ во западна Германија; пилотот безбедно се катапултираше, но се здоби со повреди, соопшти командата на базата без да наведе дополнителни детали.
Во „Спангдалем“ се стационирани околу 20 борбени авиони Ф-16, објави германската новинска агенција ДПА.
Ескадрилата, која дава поддршка на американските воени и НАТО-мисии ширум светот, претставува клучна компонента на базата, во која се ангажирани 5.000 припадници на војската и цивилен персонал – вклучително и повеќе од 700 Германци.
Американските воздухопловни сили се присутни во „Спангдалем“ уште од средината на 1950-тите години. Заедно со воздухопловната база „Рамштајн“ во близина на Кајзерслаутерн, во југозападна Германија, таа се смета за една од најважните бази на американската војска во Европа.
