Во ноќта меѓу сабота и недела, на 25 октомври 2026 година, започнува зимското сметање на времето. Стрелките на часовниците ќе се поместат еден час наназад. Промената ќе се случи во недела во 3 часот по полноќ, кога часовниците ќе се вратат на 2 часот. Со тоа завршува периодот на летно сметање на времето, а зимскиот режим ќе остане на сила до последната недела во март 2027 година.
Повеќето современи уреди, вклучувајќи ги мобилните телефони, компјутерите и паметните часовници, автоматски ќе го ажурираат времето. Кај постарите часовници и уредите што не ја поддржуваат оваа функција, промената ќе треба да се направи рачно.
Со враќањето на зимското сметање на времето, утрата ќе бидат посветли, но сонцето ќе заоѓа еден час порано според часовникот. Ова може да се одрази врз секојдневните активности и навиките за спиење, особено во првите денови по промената.
Иако добиваме еден час дополнителен сон, приспособувањето на новиот распоред кај некои луѓе може привремено да предизвика замор, нарушување на сонот и потешкотии при заспивањето или будењето.
За полесно прилагодување, се препорачува одржување редовен распоред на спиење, изложување на природна дневна светлина и избегнување користење електронски уреди непосредно пред легнување.
Зимското сметање на времето ќе трае до недела, 28 март 2027 година, кога часовниците повторно ќе се поместат еден час нанапред.
Датумите за промената, според доставените информации, се утврдени со одлука на Владата објавена во „Службен весник“ број 58 од 19 март 2026 година.
ИЗДВОЕНИ
Обновен е релјефот на мајката со трите деца на споменикот на децата бегалци од Егејска Македонија
Инјекција во здравството – 100 нови возила за побрза Брза помош
Обвинителство: Не губиме контрола врз предметот Лотарија, се истражува зошто првиот сведок ја „сврте“ изјавата
За автопатите, годинава се обезбедени 243 милиони евра, дел се заем од домашните банки
